WILLIAMNAGAR: East Garo Hills a·jani headquarter Williamnagar-o pilakni gitan namroro silroroanirang dongjaengani a·sel jolo songdongenggipa manderang neng·nikanirangko chagrongna nangtokenga ine A·chik Holistic Awakening Movement (AHAM) parakatenba, iani bidingo kamrangko nirokatchina gita a·dokni Chief Minister Conrad K Sangma-na sedoataha.
Iani bidingo a·dokni Chief Minister-na sedoatengon, Williamnagar Civil Hospital-o nanganirangkoba AHAM-ni dilgiparang janapataha.
“Williamnagar Civil Hospital-o chimangmangkoba chu·onga gita man·jaengani a·sel rongtal an·talani dongjae, saenggipa manderangna namen kenchakna nangani ong·enga. Unbaksana ia hospital-o sagipa manderangnan chu·onga gita kuturirang dongja, sagiparangko sanna gita specialist doctor-rangba dongja, Ear, Nose & Throat (ENT) specialist-rangba dongja aro ia hospital-o Optometrist, eye specialist baksana child specialist-rangba dongjani a·sel manderang, gipin biaprangonasa re·ange sanna bananirangko ra·na nangenga,” ine AHAM-ni general secretary Aimarong Marak parakataha.
Williamnagar Civil Hospital-o kam ka·giparangna dongchakanirangko rike on·china, specialist doctor-rangko chu·onga gita on·china aro laboratory-ko chu·gimik ong·e donchina gitaba AHAM, sorkariko didiataha.
East Garo Hills a·jao an·o donggipa me·chikrang aro bi·sarangko name nirok sandina man·na gita Williamnagar-o Maternity & Child Hospital-ko kulichina gitaba AHAM dabiangaha.
Indake ong·engon, songo noko donggipa manderangni janggi tanganiko namdapatna gita Samgong Bolsal Akilrang-oni Bolmoram songona PMGSY ramako tarie on·china gitaba AHAM, a·dok sorkariko didiataha.
Williamnagar-ni Denggagre gittimo donggipa GNM Nursing School-o nokrang chu·ongjae neng·nikanirangko chagrongna nangtokenga ine janapatengon, ia Nursing School-na chu·onga gita nokrangko aro pilak nanganirangko on·china AHAM didiataha.
“Ia Nursing School-o staff quarter-rangko ta·raken rikchina chinga didienga aro ia skulo chatrorangko skie ra·pana cholko man·china gita chatrorangna dingtang hostel-ko rikchina chinga didienga,” ine AHAM parakataha.
Bon·kamao uamang, Williamnagar Government College-o dingtang dingtang stream aro subject-rangko ra·gatchina gitaba a·dokni Chief Minister-ko mol·molataha.
