SHILLONG: NEHUSU-ni membor-rangko grongna somoi on·ani ja·manba uamangko grongna jechakahani gimin Sombar salo NEHUSU-ni membor-rang, North Eastern Hill University (NEHU)-ni Vice Chancellor Prof Prabha Shankar Shukla-ko grongdraeaha aro dolgnini gisepo adita nanggrikanirang ong·angaha.
Koborko on·ani gitade, NEHUSU-ni membor-rangko Sombar salni 1:00 bajio VC-ni office-o grongna gita re·anggipa Sukrobar salon somoi on·e tik ka·manahachim indiba NEHUSU-ni membor-rang kontagni sengahaoba uamangko grongna okamjahani gimin NEHUSU-ni membor-rang an·tangtangan VC-ni office chamber-ona napdraangna tik ka·aha.
VC-ni office chamber-ona napdraangani ja·man, NEHUSU-ni membor-rang suk ong·jae, chatro chatrirangni nanganirangko niatna gisiko nangjaengani gimin VC-ko sing·doangaha.
Koborko on·ani gitade, University Grants Commission (UGC)-ni recommend ka·gimin gita ming 10 point donggipa grading system-ko ra·gatani bidingo chanchirimna gita antisani gisepon Academic Council-ni tom·aniko ong·atchina NEHUSU, VC-na somoiko on·angaha.
VC-ko grongeani ja·man kobor ra·timgipa manderang baksa agangrikengon, uamangni dongimin somoi gita NEHU-ni VC, Academic Council-ni tom·aniko ong·atjagenchimode uamang chanchirimtaienba nanga gita ja·kurangko de·anggen ine NEHUSU-ni president Sandy Sohtun parakataha.
