TURA: Jal Shakti Ministry-ni ning·o donggipa Drinking Water & Sanitation Department-ni gita September 14 tarikoni October 2 tarikona ‘Swachhata Hi Seva-2024(SHS) Campaign-ko ong·atengani gimin West Garo Hills a·jaoba District Administration-ni gita Mega Cleaning Drive ba jinma rongtalataniko re·baenggipa September 28 tariko ong·atanggen ine West Garo Hills a·jani Additional Deputy Commissioner (ADC) parakataha.
Ia salo, West Garo Hills a·jani ning·o donggipa dingtang dingtang office-rang, institution-rang, bazar antirang, skul-college-rang, mongsonggipa ramarang, camp ka·chakgipa biaprang, chiring chibisikrang, nallarang, tourist spot-rang, olakkiram nokrang, jabol galchakgipa biaprang, jinmani a·pal re·chakram biaprang aro uandakgipa dingtang dingtang biaprangko manderang jinma rongtalatatanggen ineba ADC parakataha.
Ia donsogimin salo, gittimtangtango ba kam ka·chakgipa biaprango jinma apsan rongtalanirango bak ra·china gitaba ua West Garo Hills a·jao songdongenggipa pilak manderangkon didiataha.
