SHILLONG: Budbar salo Meghalaya Cabinet tom·e chanchirimangenba, Shillong Airport-ko dal·batatna gita a·arangko ra·dapna manchianiko ra·chakangaha.
Iani bidingo, Cabinet tom·a matchotani ja·man kobor ra·timgiparangna talate on·angengon, Shillong Airport-o dal·dalgipa sildorengrang onchongna gita ia airport-ko dal·batatna cholrang dongkuenga ine Airports Authority of India (AAI)-ni survey ka·taianiko nikahani gimin da·o a·dok sorkari, ia airport-ko dal·batatna gita Directorate General of Civil Aviation (DGCA)-oniko pilak nanga permission-rangko ra·na tik ka·angaha ine a·dokni Chief Minister Conrad K Sangma parakataha.
“Shillong Airport-ko dal·batatna gita a·arangko ra·dapna manchianiko da·al Cabinet ra·chakaha aro kamrangko a·bachengatchina on·angaha,” ine Sangma aganaha.
Ia airport-ko dal·batataniara a·dokna dingtanganiko ra·baanian ong·gen ineba ua ia kamo sorkari baksa bakrimchina gita pilak dolrangkon aro a·doko songdongenggipa pilak manderangkon didiataha.
Transport department-ni mesoke on·anggipani bidingo janapatengon, “Chinga kamrangko jako ra·na a·bachengaha aro da·o planning-ni kamrangko ka·kuengmiting. AAI-ni survey ka·anion ia airport-o dal·dalgipa sildorengrangko onchongatna gita airport-ko dal·batatna cholrang dongkuenga ine nikahani gimin ia airport-o A320 aro Buoying 373 gita dakgipa sildorengrangko onchongatna chinga kamrangko a·bachengatna man·gnok,” ine Chief Minister parakataha.
Transport department aro AAI-ni on·gipa report-ko niangani ja·man da·o sorkari, DGCA baksa tom·e iani proposal-ko on·anggnok ineba Chief Minister parakataha.
“DGCA baksa tom·ani chu·sokgipa ong·gen ine anga ka·dongenga maina chinga iani bidingo raken kamko ka·enga. Skangode chingo iana roadmap dongkujachim indiba da·ode chingni mikkango roadmap dongahani gimin kamrang chu·sokgen ine chinga ka·dongna man·engaha,” ine Sangma aganaha.
Shillong airport-ni runway-ko meter 571-chi bakrodapatna man·gen aro iana a·dok sorkari gong kror 100-ko koros ka·na nanggen aro bangkikode AAI koros ka·e gimik gong kror 500-mang ong·gen ine Mongolbar salo AAI, Meghalaya High Court-na u·iataha.
Baljek Airport-ni gimin sing·anina aganchakaniko on·angskaengon, ia airport-ko dal·batatna gitaba a·arangko ra·dapna da·o kamrangko ka·engaha ine Chief Minister parakataha.
“Baljek airport-na nangdapenggipa a·arangko ra·na gita DC office-ni revenue branch kamrangko ka·engaha. Uamang skanggipa report-kode on·manaha indiba ua somoio AAI report-ko chu·ongnikjahani gimin da·o Shillong aro Baljek airport damgnini chu·gimik report-kon taritaiengaha,” ine Chief Minister aganaha.
