SHILLONG: Sixth Schedule-ko taridapna sienggipani bidingo Sixth Schedule a·jani MP-rang baksa agangrikchengchina gita didie, Tura-ni MP Saleng A Sangma, Home Affairs-ni Union Minister of State Nityanand Rai-na sedoataha.
Union MoS-na sedoatgipa chittio Sangma-ni parakatani gitade, salgro salaram jolrango songdongenggipa Tribal manderangni bil aro daka rikanirangko ripinge rakkianio manderangni ka·dongchakanikoba man·na gita Constitution-ni Sixth Schedule-ko taridapani bidingo Sixth Schedule a·jani pilak MP-rangoba sing·e sanne ra·na nangenga.
Sixth Schedule-ko taridapna sienggipa Amendment Bill-ni giminba ua talataniko on·china gita Union Minister of State Nityanand Rai-na seatgipa chittio didiataha.
Sixth Schedule-ara Tribal jatrangni bilrangko aro daka rikanirangko chel·chakna gita namen mongsonggipa niam ong·a ine janapatengon, ia Bill-ko basako pass ka·na miksongenga, uani giminba una talataniko on·china gita Sangma, Union MoS-ko didiataha.
Ia Amendment Bill-ko da·o ong·atna sienggipa Parliament-ni Winter Session-ona ra·angnaba gnang ine ka·dongsoenga.
Salgro salaram jolrango donggipa Autonomous District Council-rangko bilakbatatna gita ia Sixth Schedule-ko taridapna siengachim.