Matchu cha·aniko champengna jinma re·jomna manchianiko GH-oba jegala

TURA: India a·song gimikon matchu den·aniko champengna miksonganio dolsa Hindu manderangni a·dokni skotong Shillong songjinmao re·jomaniko ong·atna tik ka·aniko South Garo Hills a·jani social activist Greneth M Sangma-ba raken jegalataha.
Jagadguru Shankaracharya Swami Avimukteshwaranand Saraswatiji Maharaj-ni dilanichi a·song gimikon matchu den·aniko champengna gita ma·mongo niamko ra·gatchina dabienga ine kobor on·gipani bidingo janapatengon, ian Meghalaya gita dakgipa Kristian a·doko dingtang dingtang jat aro toromrangni tom·tome songdong a·chaaniko golmal ka·na jotton ka·anisa ong·enga ine Sangma parakataha.
“A·songo matchu cha·aniko champengna jotton ka·aniara Meghalaya a·doko songdongenggipa manderangni bil aro jakgitelaniko ra·sekna jotton ka·anisa ong·enga. India a·songni salgro salaram jolo donggipa Kristian a·dok ong·e chinga pilak torom aro bebera·anikon mande ra·a indiba a·doko chingni tom·tome songdong a·chaaniko iandake golmal ka·nade chinga on·jawa,” ine Greneth parakataha.
A·chikrangni daka rikanianio matchurangara namen mongsonggipa ong·a ine janapatengon, A·chikrangni bia ka·ani, tom·bimongani aro uandakgipa program-rango pangnan A·chikrangde matchu be·enkon cha·bata aro iandake manderangni matchu cha·aniko champenganiara a·songni ning·o manderangna on·gimin jakgitelaniko champenganisa ong·enga ine Sangma parakataha.
Meghalaya a·doko matchu den·aniko champengna miksonganiko jegalatengon, manderangni bil aro jakgitelaniko re·badena man·jana gita raken nirok sandianirangko dakchina ua sorkario dabiangaha aro iako manigija dakdragenchimode a·doko songdongenggipa manderang pilakan ku·cholsan ong·e dakgrikgen ine mikrakataniko on·angaha.