TURA: West Garo Hills-ni Bhangapar songni manderang, jinma apsan ong·e West Garo Hills-ni Deputy Commissioner Jagadish Chelani-ko uamangni songo MGNREGS-project-ni kamrang tik ong·gijani bidingo badi ka·anina ta·rakean aganchakatani gimin mittelataha.
“MGNREGS scheme-o nakatgipa kamrangko Dembemma C&RD Block-ni ning·o ga·akgipa Bhangarpar songo name dake ka·jaenga ba project-ni kamrang tik ong·ja ine ia bilsi June jani 109 tariko badi ka·ahachim. Iana Deputy Commissioner, ta·raken chingni badi ka·aniko knachake Block Development Officer (BDO)-ko kamko nirokchina ge·etaha, ine songni manderang aganaha.
Uandake DC-ni ta·raken ja·ku de·anichi VEC, an·tangni kamna kene kam wataha.
Jolni manderangni aganani gita, officer sakgipin Assistant Commissioner Chaitanya Awasthi-ko project-ni kamrangko nirokna gita songona wataha, unon officer, project-ni kamrang tik ong·gijaniko mikrontangchi nikaha. Mikka waani somoi ong·genchimoba officer kamtangko nirokna sokangani gimin songni manderang Awasthi-koba mittelataha.
Indake ong·engon da·o ong·enggipa VEC memborrang batanggimin bilsi dokrangoni uamangni post-ko ra·e dongenga. Niam gitade bilsi gittamprakon election-ko ong·atna nangachim, ine janape songni manderang ia mamlakoba nirokatchina mol·molataha.
