SHILLONG: Deputy Chief Minister, Sniawbhalang Dhar-ni kosako matnangani namen dingchikgipa ong·a, sakki dongmanchaa ong·ode MPCC Chief Vincent H Pala, uni kosako niam gita badi ka·dona nanga ine Voice of the People Party (VPP) aganaha.
A·doko drugs badinganio Deputy Chief Minister, Sniawbhalang Dhar jak donga ine MPCC Chief, Sniawbhalang-ni kosako matnangahachim, jean MPCC Padotni kosako kror 100-na defamation case ka·skaahachim.
“Deputy Chief Minister-ni kosako matnanggipa namen dingchikgipa ba chanchina nanggipa a·sel ong·a. Vincent Pala, uo maiba sakki dongode Dy CM-ni kosako niam gita badi ka·china” ine VPP-ni ku·wattimgipa Batskhem Myrboh aganaha.
Indake ong·engon, uni party-oni maming sakki dongjani gimin agandapangkunade ua jechakaha.
Indake ong·genchimoba “A·doko ong·kenggipa drugs-ni ka·mikkenatanirangna uni party namen jajrengchaka, maina a·dok sorkari ia ka·mikkenatanirangko warachakna gita dal·e ra·jaenga” ine Myrboh aganaha.
