Pressure group-rang, Shankaracharya Swami-ko a·doko napna on·ja

SHILLONG: Mijal salni bako Shillong Airport-o Shankaracharya Swami Avimukteshwarananda Saraswati Maharaj aro uni dolko Agartala-oni Shillong Airport-ona sildorengo bilbaako napna on·jana gita pressure group-rangni ritchani ritcha manderang uni Shillong-ona re·baako jegalna placard-rangko aro banner-rangko ra·e tom·daksoaha aro jegalrimanichi ong·ronggijagipa obostao ong·aha. Ua matchu den·ako champengna aro matchuko a·songni ma·gipa ine parakatchina uni dabigipa Gau Dhwaj-ko ong·atna miksongengachim.
Jegalgrimako man·ani gisepo Shankaracharya ja·mano uko Shillong-ona re·angna watgijani aro 21000 feet chuao Meghalaya-ni bangbango uni sildorengo Gau Dhwaj-ko songdoani video-ko mesokataha.
Mijal Sonibar salo KSU, FKJGP gita dingtang dingtang pressure group-rangni ritchani ritcha memborrang aro gipinrang  placard-rangko aro banner-rangko ra·e Shankarachaya-ni Shillong-ona re·baako aro nisanko songdoako jedakeba jegalna miksonge Shillong Aiport-o sokchimongaha.
Shillong Airport-ona bang·en police dolkoba watataha.
Agartala Airport-o a·bachengao uko Shillong-ona  re·angna watjaha uni gimin AAI Shillong-oni aro a·dokni bil gnanggiparangoni ge·etako man·aha aro ua una sawa hukumko on·jaha bil gnanggipaoniko che·em report-ko jedakode uamangni kosako niam gita ja·ku de·na man·gen ine Shankaracharya parakataha.
Indake ong·engon, Shillong Airport-o, Ri Bhoi SP Jagpal Singh Dhanoa, uko Airport-o a·dokona re·bana on·jaha aro uamang an·tangtangba Durga puja somai ong·nasiengani gimin Shillong-ona re·bana sikjaha ine pressure group-rangna aganaha.
Airport-o Shankaracharya-ni uni sildorengo gau dhwaj-ko chipjange uamangni Meghalaya-ko bilangani video-ko watako gimikan nikaha.
Ja·mano Shankharacharya aro uni team indake aganaha Gaudhwaj Sthapana Bharat Yatra-ni gita, Shankaracharya  a·bachengao Agartala-ona re·ange Gau Dhwaj-ko ong·ataha.
Uko Shillong-ona re·baana on·jaha indiba uni resolution gita ua Gopratistha nisanko uni sokani bakan Meghalaya-ni bangbango songdoaha aro matchu den·ako chel·chakna uni skaniko chu·sokataha, uamang aganaha.
“Jemangan angni re·baako jegala anga uamangko mittelna ska maina na·simang jegalgipa ong·a, chinga nisan sokna man·aha,” ua ru·utgija salni gisepo programme-ko ong·atna Meghalaya-ona re·bagen ine ua aganaha.
Uamang manderangni cha·rongbewal cha·aniko aro cha·na man·ani bil-rengsiko champengna jotton ka·enga ine ja·mano KSU General Secretary Donald Thabah aganaha.
“Chinga Kristian-rang ong·a aro a·bri jatni dokkol ka·gipa a·dok ong·a chinga maming saloba Hindu-ko matchu aro Muslim-ko wak cha·na draja,” Shankaracharya India secular a·song ong·aniko aro sakantian uamang jeko namnika uko cha·na man·ani bil dongako ma·sina nanga,’’ Thabah aganaha.
“Chinga saksa sakgipini dakbewal aro bebe ra·aniko mande ra·a,’’ a·dok sorkari, indakgipa manderangni Meghalaya-ona re·baako aro manderangni kosako uamangni skaniko dakdrana amako champengna nanga, ua aganaha.
KSU memborrang raken nirikkiangkugen aro Shankaracharya-ko a·doko napna on·jana gita adita salrangna uamang Byrnihat-o senggen, ua u·iataha.