TURA: Meghalaya a·doko matchu den·ani aro cha·aniko champengna miksonge re·jomaniko ong·atna manchiani ja·man a·doko matchu cha·aniko champengna jotton ka·engani gimin Garo Students Union (GSU)-ba raken jegalataha aro a·doko songdongenggipa manderangni daka rikani aro cha·ani ringani bewalko champengna jotton ka·genchimode warachakaniko on·angaigen ine parakataha.
“Chinga Garorang an·tangtangni daka rikaniko bilaken ja·rikgiparang ong·a aro a·paloni re·baenggipa dolrangko chingko champengna aro chingni daka rikaniko dingtangatna on·jawa. A·doko songdongenggipa Tribal jatrangni daka rikanirangko iandake champengna jotton ka·genchimode iako chinga nie dongchajawa,” ine GSU parakataha.
A·chikrangni daka rikanirangko talate on·angengon, matchu den·anide A·chikrangni daka rikanio mongsonggipa bakan ong·a ine GSU parakataha.
“Hindu toromko man·chape chinga pilak toromrangkon aro bebera·anikon mande ra·giparang ong·a indiba toromni bimingo chingni cha·ani ringaniko champengna jotton ka·aniara jatsa jatgipin toromsa toromgipinni gisepo so·sojengjeng ong·atanikosan ra·baaigija Hindu-rangni gimin ong·gija dake mesokaniba ong·gen,” ine GSU janapatenba, iandake toromni bimingo a·songo manderangni tom·tome songdong a·chaaniko golmal ka·na jotton ka·genchimode jrip nie dongjawa ine mikrakataniko on·angaha.
