SHILLONG: Meghalaya a·dokoba matchu den·ani aro cha·aniko champengna gita dolsa Hindu manderangni manchiengani a·sel adita so·sojengjeng ong·anirangko nikna man·engon, Meghalaya a·doko nambate re·dilna man·na gita saksa bilakgipa aro ka·donggipa chief minister-kosa nangenga ine Voice of the People’s Party (VPP) a·kangataha.
“Meghalaya a·dokko dilenggipa Chief Minister saksa bilgrigipa, on·kanga grigipa aro daitotangko jako ra·na man·gijagipasa ong·ani gimin a·dokni obostarang namjabatroroenga. Matchu chel·chakna gita re·jomaniko dakna miksonggipa manderangna permission on·aniko ua Deputy Commissioner-nasa pakwate on·skaaha aro ian saksa Chief Minister ong·e mesokanio namen ka·pongni kamko mesokaha. Meghalaya a·dokko mikkangoni re·dilna gita saksa bilakgip chief minister-kosa nangenga,” ine VPP-ni ku·wattimgipa Batskhem Myrboh aganaha.
‘Gau Yatra’ ba matchurangko chel·chakna gita re·jomaniko ong·atna miksonggipani bidingo janapatskaengon, ian a·songo so·sojengjeng ong·aniko ra·bana jotton ka·gipa manderangni a·song damsan, daka rikani mingsan, torom ge·san aro cha·ani ringani apsan ong·atna ka·donge dakdraanisa ong·enga ine Myrboh parakataha.
“Uamangni ja·ku de·aniara ra·biani baksa dakanisa ong·enga aro iako jedakeba champengna nangchongmota. Nanggenchimode ia kamo jak donggipa manderangko pattokoba chipna nanga,” ine VPP-ni ku·wattimgipa aganaha.
Matchu be·enara bang·bata Tribal manderangni mongsonggipa cha·anian ong·a aro ia manderangni re·jomaniko ong·atdrana jotton ka·aniara Tribal-rangni daka rikaniko chonnikani gita ong·a ineba ua aganaha.
“India a·songni salgro salaram jolrango donggipa manderang, India a·songni gipin biaprango matchu be·enko cha·china didie jinma re·jomaniko ong·atskagenchimode mai ong·genchim?” ine Myrboh sing·doangaha.
A·songo songdongenggipa dingtang dingtang jatrang saksa sakgipinko mande ra·grikgenchimosa bilakgipa a·song ong·na man·gen ineba ua aganaha.
