GH-o skanggipa changna Int’l Coffee Day aro AGHMPCS-ni Foundation Day-ko mania

TURA: Garo Hills-o skanggipa changna International Coffee Day aro All Garo Hills Multi Purpose Cooperative Society (AGHMPCS)-ni Foundation Day-ko Mongolbar salo, Babadam songo maniangaha aro ia salko manianio, Meghalaya Legislative Assembly-ni Speaker Thomas A Sangma baksana dingtang dingtang dilgiparangba bak ra·angtokaha.
Ia salko manianio dingtang dingtang cooperative society, coffee ge·giparang aro game ge·e cha·giparangna aganprakangengon, ian skanggipa changna Garo Hills-o International Coffee Day aro AGHMPCS-ni foundation day-ko manianiba ong·engani gimin Garo Hills-na namen gisik ra·beani sal ong·enga ine Meghalaya Assembly-ni Speaker parakataha. Coffee-an a·gilsako manderangni ringna namnikbatsranggipa ringani ong·a ine janapatengon, coffee-ara ringanimangmangsan ong·aija indiba a·gilsakni dingtang dingtang biaprango songdongenggipa manderangko nangrimatgipa gitaba ong·a ine Sangma aganaha.
Garo Hills-o coffee-o inditana mingsingkujaengoba da·o bang·a manderangan coffee-ko an·tangtangni janggi tangani chol dake ra·na a·bachengengahani gimin bakan ian Garo Hills-oba mingsinggipa ong·gnok ineba ua aganaha.
Garo Hills-o coffee ge·ani aro tarianiko AGHMPCS jako ra·ahani gimin game ge·e cha·enggipa manderangko coffee ge·china didina nangenga ineba Sangma aganaha.
Garo Hills-o bading chiwalgiparangna aro game ge·e cha·enggipa manderangna dakchakanirangko on·engani gimin ua Meghalaya sorkari, dingtang dingtang bank-rang, NABARD, cooperative society-rang aro dingtang dingtang department-rangkoba mittelpilangaha.
Adita bilsirangni gisepon chu·sokaniko man·engahani gimin AGHMPCS-ni secretary Fr Sunny Mavelil aro society-ni membor-rangko mittelpilangskaengon, mikkangchiba AGHMPCS-ni kamrango chu·sokgipa ong·angkuchina ine Sangma an·tangni namgipa skaniko parakangaha.
Ia tom·anio Assembly-ni Speaker Thomas Sangma-ni jakchi Ge·am Gardens-koba a·bachengate on·angaha aro Meghalaya sorkarini on·enggipa lak 2-ni coffee machine-rangkoba dingtang dingtang manderangna suale on·angjolaha.
Ia tom·anio dongpae jinmana aganprakanggipa gipin manderangara, Rongram C&RD Block-ni BDO Cherime Sangma, Tura Coffee Board-ni SLO Sun Mahammad Ali, Coffee Board-ni Joint Director Naveen Kumar B Rynthathiang, NEHU Tura Campus-ni Director Sujata Gurudev aro gipinrang ong·a.