SHILLONG: State Reservation Policy-ko nipilna gita songako man·gipa Expert Committee, October 3 tarikoni a·bachenge Shillong, Tura aro Williamnagar-o public hearing-ko ong·ate, manderangni nangnikanirangko knatime ra·anggen.
Iani bidingo, State Reservation Policy-ko nipilna gita songako man·gipa Expert Committee-ni Chairman Justice Mool Chand Garg, u·iataniko on·angaha.
Expert Committee chairman-ni u·iatani gitade, State Reservation Policy-ko taridapani bidingo manderangni nangnikani aro agan-ku·pattianirangko ra·na gita ia committee, October-ni 3 tarikoni 5 tarikona Shillong songjinmao public hearing-ko ong·atgen aro October 21 tarikoni October 25 tarikona Tura aro Williamnagar-o ong·atangskagen.
Shillong songjinmao ia public hearing-ko October 3 tarikoni 5 tarikona pring 9:00 bajioni attam 1:00 bajiona aro attam 2:00 bajioni attam 6:00 bajiona State Convention Centre-o ong·atgen ineba Expert Committee-ni Chairman u·iataha.
Tura aro Williamnagar-o ong·atna sienggipa public hearing-ni giminde ja·mano biap aro somoirango talbate u·iatskagen.
Ia public hearing-ona re·bae bak ra·china gita dingtang dingtang dolrangko aro a·doko songdongenggipa manderangko didiatengon, an·tangtangni ku·pattianirang aro chanchianirang baksana nangchongmotgipa lekkarangkoba ra·bachina gita State Reservation Policy-ni Expert Committee u·iataha.