SHILLONG: Re·anggipa October-ni 1 tarik Mongolbar salo, gari a·sel ong·anio saknaa man·gipa manderangko Ranikor Community Health Centre (CHC)-ona ra·angon, health centre-o kam ka·enggipa doctor aro nurse-rang, sanna bananirangko on·ningjahani a·sel saknaa man·gipa manderangna kenchakna nangani ong·aha ine Garo Students Union (GSU) Khasi Hills Zone, Health & Family Welfare Department-ni ning·o donggipa Health Services (MI)-ni Director-na badi ka·doangaha.
GSU-KHZ-ni president Tengku M Marak-ni parakatani gitade, Mongolbar salo gari a·sel ong·ani ja·man saknaa man·gipa bang·a manderangkon Ranikor CHC-ona sanna gita ra·angahachim indiba CHC-o kam ka·enggipa doctor aro nurse-rang simsak nirokanirangko on·na gisik nangjaha aro baditaba kontarangna sengani ja·mansa ia manderangna sanna bananirangko on·aha.
“Chingna u·iatani gitade, ua somoio saknaa man·gipa manderangni mata bu·anirangko CHC-o kam ka·enggipa sweeper-sa maming skia man·ani gri, sanne bane on·aniko nikna man·aha aro ian health centre-o kam ka·enggiparangni simsakgijaniko mesokani ong·aha,” ine GSU-KHZ-ni president parakataha.
Marak-ni parakatani gitade, a·sel ong·anio saknaa man·gipa manderangko Shillong-ona salbana gitaba Ranikor CHC-ni official-rang, ambulance-ko on·na jechakahani gimin km 40 chel·ao donggipa Khonjoy PHC-onikosa ambulance okamatna nangaha aro uandaken saknaa man·gipa manderangko Shillong-ona ra·anganio ja·manchakatako man·na nangaha.
Iani bidingo inquiry-ko dakenba CHC-o kam ka·enggipa official-rangni kosako rakgipa ja·kurangko de·china gitaba GSU-KHZ, Health Services (MI)-ni Director-ko didiataha.
