TURA: Budbar salo, Rongram C&RD Block-ni ning·o donggipa Selbalgre songo, Plastic Waste Management Unit-ko Meghalaya Legislative Assembly-ni Speaker Thomas A Sangma kulie on·angaha aro ia unit ba karkanako kuliani somoio Swachh Bharat Diwas-koba maniangjolaha.
Ia tom·aniko ong·atanio, West Garo Hills-ni SDO (Sardar) Manish Kumar, Rongram C&RD Block-ni BDO Cherime Sangma, Mawmluh Cherra Cements Limited (MCCL)-ni Vice Chairman Dabo Mrong Marak, SE Ambrose D Sangma, dingtang dingtang department-ni officer-rang aro jolo songdongenggipa manderangba bak ra·angtokaha.
Garo Hills-o ia Plastic Waste Management Unit-an skanggipa unit ong·aha.
Ia tom·anio, Assembly-ni Speaker Thomas A Sangma, jinmana aganprakangengon, Tribal songrangode pangnan rongtal an·talaniko rakkirongachim indiba da·ororode pilak biaprangon plastic-ko jakkaltokengahani gimin songadam nokadamrangba jabolrara dakaniko nikna man·engaha ine songo noko jabol dakaniko champengna nangengani gimin didiani kattarangko aganangaha.
Manderang skatang jabolrangko galengani a·sel jabol galtimgiparang jabolrangko ma·eke galanio neng·nikanirangko chagrongna nangtokenga ine janapatengon, sojronggipa aro soninggijagipa bosturangko noktangtangon ma·ekate galchina gita Sangma, pilak nokdangrangkon didiangaha.
Ia Plastic Waste Management Unit-ko kulianichi plastic jabolrangko nama bewalo chimonge jakkalpiltaina gita dakchakani ong·gnok ineba Assembly Speaker aganaha.
Manderangni namgnina rongtal an·talaniko rakkina gita sorkari dingtang dingtang scheme-rangkoba ra·gate on·enga ine janapatskaengon, nama bewalrangko pangnan ja·rikchina aro ia a·gilsakko mikkang chasongrangonaba name rakkiangchina gita Sangma didiangaha.
Ia tom·anio, PHE-ni SE aro West Garo Hills DSBMG-ni Member Secretary Ambrose D Sangma-ba jinmana aganprakengon, Swachhta Hi Seva-ko campaign-ko a·songni pilak biaprangon rongtal an·talatanirangko dake Swachh Bharat Mission-ni bilsi 10 gapaniko manina gita 2024 bilsini September 17 tariko a·bachengataha aro ia campaign-ko October-ni 2 tariko Swachh Bharat Diwas-ko manianichi matchotatenga ine talataniko on·angaha.
Selbalgre-o Plastic Waste Management Unit-ko Assembly Speaker kulie on·a
Date:
Share post:
