TURA: Bangladesh a·songoni niam gri re·napbagipa sak 17 manderangko Bristibar salo, West Garo Hills a·jani police-rang rim·taina man·aha. Ia sak 17 manderangoni sakgnide me·chikrang ong·achim.
Iana skangba Bangladesh a·songoni niam gri re·napbagipa sak 12 manderangko, West aro South West Garo Hills a·jarangoniko police-rang rim·na man·ahachim.
Koborko on·ani gitade, Bangladesh a·songoni niam gri re·napbagipa sak 17 manderangko police-rang Bristibar pringo, Guwahati aro dingtang dingtang biaprangona re·angengmitingo Hallidayganj police station-oni adita chel·ao donggipa Sobribari songoniko rim·na man·aha.
Rim·ako man·gipa manderang bang·batan Karnataka aro Tamil Nadu a·dokrangona kamrangko ka·e cha·na re·angengachim ine police-rang u·iataha.
Rim·ako man·gipa manderangara, Sharif Roy (28), Chayan Roy (22), Nahid Sheikh (22) Mizanur Sheikh (19), Habib Sheikh, Alamgir Sheikh (26), Shabbir Sheikh (20), Saidul Islam (25), Shipon Sheikh (35), Maroof Sheikh (26), Amin Sheikh (18), Rajab Ali (18), Kabir Sheikh (38) Md Robiul Islam (38), Kabir Sheikh (32), Shabana Sheikh (22) aro Parul Sheikh (18) ong·a ineba police-rang u·iataha.
Ia manderango sing·sandion, uamangko India a·songona re·bana gita Bangladesh a·songni mande saksa dakchakataha aro uamangna tol·gipa Aadhar card-rangkoba ua mandean tarie on·aha ine rim·a man·gipa manderang parakaha.
Ia manderang, Dalu sima gita India a·songona re·napbaaha ineba uamang parake on·aha.
Bangladesh a·songo so·sojengjeng ong·anirang namsrangkujaengani a·sel dokkol ka·ako man·enggipa manderang a·song damgnini sima gita India a·songona napsrukbana jotton ka·skaengachim ine nikna man·a.
India aro Bangladesh a·songni simarangko fencing kae, iandake niam gri napsrukbaaniko champengsona jotton ka·engoba Bangladesh a·songni manderang, niam gri chibimarang gita, a·brirang gita aro dikbegipa buringrang gita napdrabana man·skakuengachim.
Bangladesh a·songo so·sojengjeng ong·engani gimin iandake India a·songona napsrukbana jotton ka·anirang ong·gen ine ma·sisoenba BSF aro Meghalaya Police-rang, dingtang dingtang biaprango mikrakbee nirok sandianirangko dakenga aro batanggimin salsnini gisepon Garo Hills-oba bang·en Bangladesh a·songoni niam gri napsrukbagipa manderangko rim·na man·engaha.
