TURA: Budbar salo, GREEN (Grassroot Level Response Towards Ecosystem Enhancement & Nurturing) Meghalaya Plus scheme-ko a·dokni Chief Minister Conrad K Sangma, Tura-ni District Auditorium-o a·bachengate on·angaha aro ia scheme-ko a·bachengatanio, a·dokni Education Minister Rakkam A Sangma aro dingtang dingtang dilgiparangba bak ra·angtokaha.
Ia GREEN Meghalaya plus scheme-ko Tura-o a·bachengate on·anganio a·dokni Chief Minister, jinmana aganprakangengon, buring bolgrimrangko ripingna gita sorkarini a·bachengatgipa scheme-ko jako ra·e kam ka·enggipa pilak songrangko mittelpilangenba, batanggimin bilsisni gisepo a·dok sorkari, manderangna namgniko ra·bana gita dingtang dingtang program-rangko a·bachengataha aro iandakgipa program-rangchi a·dokni dal·roroani aro namroro silroroaniko ta·rakbatataha ine parakataha.
“A·dokni dal·roroanina sorkari, dingtang dingtang cholrangoniko tangka paisarangko ra·e jakkalenga aro da·alo a·dokni economy-o dingtanganiko nikna man·engaha,” ine Sangma aganaha.
Meghalaya a·doko buring bolgrimrangko tangatpilna kam ka·ani bak gita a·dok sorkari, GREEN Meghalaya (PES) scheme-kon mongsonggipa ong·e jako ra·aha ine janapatengon, batanggimin bilsignini gisepo a·dok sorkari, buring bolgrimrangko ripinganio gong crore 44-na baten koros ka·aha aro mikkangchiba buring bolgrimrangko ripingna gita gong crore 200-na baten chame donaha ine Chief Minister parakataha.
Ia tom·anio a·dokni Education Minister Rakkam A Sangma-ba jinmana aganprakangengon, ia Green Meghalaya scheme-ara buring bolgrimrangko chel·chakna aro ripingna gita manderangko didina dakchakani ong·gen ine parakataha.
Garo Hills-o donggipa buring bolgrimrangni gimin janapatengon, buring bolgrimrangko ripingna gita sorkarini tangka paisarangko dakchake on·aniara manderangnan namgni ong·gen ine Sangma aganaha.
Ia GREEN Meghalaya plus scheme-ara a·dok sorkarini ra·gatgipa Payment for Eco System Services (PES)-ni bak ong·a aro buring bolgrimrangko ripingna gita ia scheme-ni ning·o dingtang dingtang songni manderangna hectare-prakon gong 20,000-ko bilsiprako on·gen.
PES-ni skanggipa bakode ia scheme-ko jako ra·e buring bolgrimrangko chel·chakna gita komibeoba hectare 2-ko nangachim indiba ia gital scheme-ni niamode hectare 1 buring bolgrimkosan nangaiani gimin bang·gija a·a dongpagipa manderang aro songrangba ia scheme-ko ra·e buring bolgrimrangko ripingna man·gnok.
Ia program-ko ong·atanio, CM Elevate, Focus aro Payment for Ecosystem Services (PES)-ni cheque-rangkoba suale on·angaha.
