SHILLONG: Tura-ni gitcham MP Agatha K Sangma-ko Meghalaya State Commission for Protection of Child Rights (MSCPCR)-ni chairperson songanio a·dokni Health Minister aro National People’s Party (NPP)-ni dilgipa Ampareen Lyngdoh-ba chakpaaniko parakataha aro uni kosako matnangenggipa dingtang dingtang dolrangko ua raken jegalataha.
“Angni kamo pangchakesa angko matnangna nangode matnange aganbo indiba saniba nogipa, saniba segipa ong·aiani giminde angni kosako matnangnabe,” ine Agatha Sangma-ko MSCPCR-ni Chairperson songaniara nokdangni politics kal·anisa ong·enga ine matnangenggipa manderangna Lyngdoh aganchakaniko on·angaha.
Saksa gitcham MP ong·gipa mandeara MSCPCR-ko dilna kragipa mandean ong·a ineba Lyngdoh parakataha.
“Saksa kamni gimin ma·sigipa aro manderangna dangdike on·na kusi ong·gipa political dilgipako MSCPCR-ni chairperson songaniara mai ong·gijani donga? Ua saniba nogipa ba saniba demechik ong·aiani gimin jegalaniara ong·ama? Angni nikanio Meghalaya a·dokni manderang, political nokdangrangko kragija dake matnangronga,” ine ua aganaha.
Manderangko iandake ka·saninggija dake mesokjachina mol·molatengon, political nokdangrangni manderangba ‘jadarang’ ong·ja ba daitotangko jako ra·na changgijagiparang ong·ja ine NPP-ni dilgipa aganaha.
“Maini gimin political dilgipa saksani depante, demechik, jikgipa ba segipako maiba kamna seokon iandake manderang matnangna ska? Chingaba manderangan ong·a aro a·dokna aro a·songna dangdike on·na miksonganirang donga,” ine ua aganaha.
Uni aganani miksonganiara MSCPCR-ni kamna Agatha Sangma-na bate qualify ong·gipa manderang dongja ine miksongani ong·ama ine sing·anina aganchakaniko on·angskaengon, “Angni agananiko ma·sisretnabe. Saoba changgittam MP ong·e SCPCR-ni kamna qualify ong·genchimode, ua badiaba dilgipani nogipa ong·aiani gimin uko kamna jegalskagenma?” ine Lyngdoh aganaha.
“MSCPCR-ni chairperson ong·na gita Agatha saksa kragipa mande ong·a aro iako ong·nikna gita anga darang dolni dilgipa ong·na nangani katta dongja,” ineba Health Minister parakataha.