TURA: Batanggimin salrango dontonggija mikkarang waanganichi Garo Hills gimikon a·arang be·dape aro chirang bananirangchi bang·a manderang siangna nangahani gimin aro bang·a manderangan nokgri jamgri ong·atako man·na nangahani gimin October-ni 8 aro October-ni 18 tariko ong·atna manchisogimin Meghalaya Civil Service (MCS) porikkako dingtang salrangona ra·doatskachina gita Tura-ni saksa social activist Flaming B Marak, Meghalaya Public Service Commission (MPSC)-ni Under Secretary-ko mol·molataha.
Iani bidingo MPSC-ni Under Secretary-na sedoatengon, “MCS porikkako October-ni 8 aro October-ni 18 tariko ong·atna tik ka·manahachim indiba batanggimin salrango Garo Hills-o mikkarang waanganichi bang·en a·sel ong·anirangko nikna man·ahani gimin Garo Hills-oni ia MCS porikkako sena sienggipa candidate-rangde nangchakeaniko man·tokaha. Mikkarang dontonggija waanganichi a·arang be·dape aro chirang bananichi bang·a manderangan siangna nangaha aro bang·a manderangan da·o neng·nikanirangko chagrongna nangtokkuengani gimin MCS porikkako sena sienggipa Garo Hills-ni candidate-rang, Tura aro Shillong-ona re·ruraanio neng·nikanirangko chagrongna nangtokenga,” ine Marak parakatenba, MCS porikkako sena sienggipa Garo Hills-ni candidate-rangna chanchie ia porikkako gipin salrangona ra·doatskachina mol·molataha.
