TURA: West Garo Hills a·jao Dalu Dapgri-oni Sonagre song gita Dimapara songona dakanggipa rama, pangna bilsian wachini somoirango chi bannanichi nosto ka·ako man·rongengani gimin ia ramako nambate tarichina A·chik Holistic Awakening Movement (AHAM), a·dokni Chief Minister Conrad K Sangma-ko didiataha.
AHAM-ni parakatani gitade, ia ramaon adita salrangna skang, skigipa saksa aro uni depanteko ta·rakbee banenggipa chi man·pakangahachim aro pangnisa sakgnian rasong grie sina nangahachim.
Ia ramara songni nokni manderangna namen mongsonggipa rama ong·a ine janapatengon, ia ramara ongipa biaposa ong·ani gimin pangna bilsian wachini somoirango chirang banne ia rama nosto ka·ako man·ronga aro re·ruraenggipa manderangna kenchakna nanganiba ong·ronga ine AHAM parakataha.
Mikkangchi chi banani somoirango nangchakeaniko man·jana gita ia ramako chukale tariskachina gitaba AHAM, a·dokni Chief Minister-ko didiataha.
“Ia ramako NH-217B-ni gadangona ra·doatgenchimode chi banani somoirangoba chel·chakaniko man·gen aro bilsigimikan ramako jakkalna man·genchim. Ongipa bakrango donggipa ramako chukalgipa biapo tariskana nanga aro chukale tarigenchimode ia rama gita chirang jokna man·jawachim,” ine AHAM-ni president George Prince Cheran Momin, Chief Minister-na sedoatgipa chittio janapataha.
Ia ramarango donggipa hume pipe culvert-rangni pal RCC dolongrangko rikskachina gitaba AHAM didiataha.
NH-217B rama jol gimikon bolni dolongrang dongkuengani gimin janapatskaengon, “Kondokgre, Gasuapara-oni Sibbari-ona kingkingan NH-217B ramao baditaba dam bolni dolongrang dongkuenga. Kenna nangbatsranggipa dolongrangara Angratoli Reserved Forest, Telekali, Dumnikura aro Dimagre-o donggipa dolongrangan ong·enga. Batanggimin salrangosan Dumnikura-o donggipa bolni dolongko Daldam chibima pe·angaha aro da·alonan ia dolongko taripile on·kujaenga. Ia dolongrangoni damsako pe·angoba South Garo Hills a·jaona re·a doani cholrang dongjae manderang neng·nikanirangko chagrongna nanggen,” ine ia rama jal·langrangko chu·gimik taridapchina AHAM, a·dokni Chief Minister-ko didiataha.
 |
ReplyForward
|
