A·sel ong·anio sianggipa manderangni nokdangrangna lak 4 ka·e ex-gratia-ko on·a

TURA: Batanggimin salrango dontonggija mikkarang waanganichi a·a be·gipa aro chi bangipa biaprangko Mongolbar salo, a·dokni Chief Minister Conrad K Sangma re·ange niangaha aro a·sel ong·anirangchi sianggipa manderangni nokdangrangna lak 4 ka·e ex-gratia ba tangka paisani gita dakchakanirangkoba on·angjolaha.
Re·anggipa Bristibar salonin mikkarang dontonggija waanganichi Garo Hills gimikon a·a be·anirangko aro chi bananirangko nikna gita man·ahachim aro Garo Hills-ni gimiko sak 17 manderang, siangna nangahachim.
Iandake neng·nikanirangko chagrongna nangenggipa manderangna dakchakaniko on·na gita Mongolbar salo a·dokni Chief Minister, a·sel ong·gipa dingtang dingtang songrangona re·angaha aro sianggipa mande sakprakni nokdangrangna gong lak 4 ka·e ex-gratia-ko on·angjolaha.
Adita salrangna skang, Dimapara jolo chi man·pakange siangna nanggipa Bijoy Marak aro uni depante Wian Chigado R Marak-ni nokdangko ua Tura-ni Rongkhon Songgital-o grongenba, ex-gratia-ko on·angaha.
Uni ja·man West Garo Hills a·jani Karonggre songo a·a be·dapako man·e siangna nanggipa Sarika M Marak-ni nokdangkoba Chief Minister grongeaha aro uni nokdangnaba gong lak 4-ni ex-gratia-ko on·angaha.
Dalu jolo donggipa Sorokpara songo a·a be·dapako man·e sianggipa me·a bi·sa Miando P Marak-ni ma·a paakoba Chief Minister, Mongolbar salo grongeaha aro gong lak 4-ni ex-gratia-ko on·angaha.
East Garo Hills a·jani Songsak jolo, gariko bol be·dapanio sianggipa Tengseng R Marak-ni nokdangkoba apsan salon Chief Minister, Dalu jolo donggipa Tibapara songona re·ange grongeaha aro uni nokdangnaba gong lak 4-ni ex-gratia-ko on·angaha.
Uni ja·man a·dokni Chief Minister Conrad K Sangma, Dalu jolo donggipa Koinabhui songo a·a rurongdapako man·e sianggipa Santa Marak sagini nokdangkoba grongeaha aro uni nokdangnaba gong lak 4-ni ex-gratia-ko on·angaha.
Dalu C&RD Block-ni ning·o a·a be·anirangchi aro chi bananirangchi komibeoba 2630 nokdangrang, nangchakeanirangko man·na nangaha aro nokgri jamgri ong·ata man·gipa manderangna District Administration, dam 68 relief camp-rangko kulie on·aha. Komibeoba sak 17,000 manderangna District Administation, cha·ani ringani aro dongchakanirangko on·aha.
South Garo Hills a·jaoba dontonggija mikkarang waanganichi bang·en a·arang be·ani aro chi bananirangko nikna man·ahani gimin Mongolbar salo a·dokni Chief Minister, South Garo Hills District Administration baksaba tom·e, nipilanirangko dakangaha.
South Garo Hills a·jao a·a be·ani aro chi bananirangchi damgittam block-rango donggipa dam 40 songrang nangchakeaniko man·angaha aro 462 nokdangrangoni sak 2510 manderang neng·nikanirangko chagrongna nangtokahachim. Adita salrangna skang, Gasuapara block ning·o donggipa Atisia Songmong-o nok te·sako a·a rurongdapanio ia nokdangni sak 7 manderang sina gita nangahachim aro ia sianggipa saksni manderangni nokdangna Mongolbar salo a·dokni Chief Minister, ex-gratia-ko on·eaha.