SHILLONG: Staff nurse aro auxiliary nurse midwife (ANM)-ni kamrangna Meghalaya Medical Services Recruitment Board (MMSRB)-ni ong·atgipa porikkako chu·gimik den·galsrangchina gita dolsa candidate-rang, Mongolbar salo dabiangskaaha.
Ia candidate-rang, Directorate of Health Services (DHS) office-ni Grievance Cell-na sedoatenba, staff nurse aro ANM-ni kamna seokani kamrango an·tangtangni suk ong·nikgijaniko parakattokaha.
DHS (MI)-na chittiko on·angani ja·man kobor ra·timgipa manderang baksa agangrikengon, staff nurse aro ANM-ni kamna manderangko seokanio niamrangko pe·aha aro iani bidingo sandirokaniko dakna nangchongmota ine candidate-rangoni saksa Lurstep Nongrum aganaha.
Apsan porikkani result-rangko maini gimin changgittam dake parakna nangaha ineba ua sing·doangaha.
Nongrum-ni aganani gitade, iandake porikkani result-rangko changgittam dake parakahani a·selan porikkako segipa candidate-rangni gisiko chanchichipanirangko ong·katataha aro suk ong·niktokjaha.
Sak 26 candidate-rangoni 72 mark man·gipa sak 22 candidate-rangni mark-rangkosan maini gimin
jinmana mesokna nangaha ineba Nongrum sing·doangaha.
Porikkako sena on·gipa mingsku sing·anirangni bidingo talataniko on·china gitaba uamang DHS (MI)-na sedoatgipa chittio dabiangaha ineba Nongrum parakataha.
Porikkako pass ka·gipa candidate-rangni kosakode uamang jegalenga ong·ja ine talataniko on·angengon, “Staff nurse aro ANM-ni kamna ra·anio ong·gija dakanikode chinga nie dongna man·jawa. Ia porikkako pass ka·gipa candidate-rangsan bimchipe poraiaha ine agananide dal·bea gualani ong·a maina ia porikkao fail ong·gipa bang·a candidate-rangan ia porikkako sena gita name tarisotokahachim,” ine Nongrum parakataha.
Staff nurse-rangni kamna ra·aniko ru·utatchae donggija ta·rake matchotatchina gita Meghalaya Medical Services Recruitment Board (MMSRB)-ni ong·atgipa porikkako pass ka·gimin candidate-rang Sombar salosan, a·dok sorkariko didiangahachim.
Iani bidingo Shillong Press Club-o kobor ra·timgipa manderang baksa agangrikengon, staff nurse-ni kamna ra·aniko ru·utatjachina ba ra·dodapjachina gita porikkako pass ka·gipa candidate-rangoni saksa Marybahun Marbaniang, a·dok sorkariko didiatahachim.
Staff nurse-ni kamna porikkako ra·anio maming ong·gija dakani dongja, dongnuaniba dongja aro susagrikanisa ong·aha ine janapatengon, porikkao pass ka·gipa candidate-rangde an·tangtangni bimchipani a·selsa pass ka·aha ine ua aganahachim.
