TURA: India aro Bangladesh a·songni A·chik chadamberang, saksa sakgipinoniko skie ra·grikna aro jatni daka rikanirangko mesokgrikna cholko man·na gita October 7 tarikoni October 12 tarikona Tura Don Bosco College, Bangladesh a·songni Caritas Mymensing Region baksa nangrime, Indo-Bangla Cultural Youth Camp-ko Tura Don Bosco College-o ong·atenga aro ia youth camp-ko re·anggipa October 7 tariko a·bachengataha.
Ia Indo-Bangla Cultural Youth Camp-ko a·bachengatanio, Garo Hills Autonomous District Council (GHADC)-ni Deputy CEM Nikman Ch Marak, mongsonggipa sokgipa ong·e bak ra·angaha aro ia tom·anio ua jinmana aganprakangengon, Indian Constitution-ni Eighth Schedule-o jatni ku·sikko chapatanichi mai namgnirangko man·genchim, uarangni bidingo agan-talatanirangko on·angaha.
Jatni daka rikani aro ku·agananirangko ripinge rakkina nangani gimin aganangengon, A·chik chadambe sakantikon jatni daka rikanirangko skie ra·china gita Marak didiangaha.
Ia Youth Camp-ko a·bachengatanio dongpae bak ra·anggipa gipin manderangara, Don Bosco College-ni Patron Fr Januarius Sangma, Guwahati-ni Vice Provincial Fr Bivan Rodriques Mukhim, Bangladesh-ni delegate Bulbul Mankhin, Don Bosco College-ni Associate Professor Dr Barbara S Sangma aro gipinrang ong·a.
Ia Cultural Youth Camp-ko ong·atanio, India aro Bangladesh a·song damgnionin A·chik chadamberang bakko ra·anggen aro saksa sakgipin baksa agangrikanirangchi, jatni daka rikanirangko skie ra·grikna gita cholrangko man·gen.
Ia Cultural Youth Camp-ko ong·atanio, a·song damgnio songdongenggipa A·chikrangni ring·ani, doka dam·ani, chrok mesaani aro jatni kal·susaanirangkoba mesokanggen.
Ia Cultural Youth Camp-ko ong·atanio, Tokbirim aro Nokpante-ni giminba apsan agan-chanchirimanirangko dakanggen aro unbaksana ia camp-o bak ra·gipa A·chik chadamberangko Garo Hills-ni mingsinggipa mitam biaprangonaba rimanggen.
