SHILLONG: India a·song gimiko gama ge·aniko National Bank of Agriculture & Rural Development (NABARD)-ni report-o Meghalaya a·dokni chu·sokgipa ong·aniko nikna man·aha.
2021-22 bilsina All India Rural Financial Inclusion Survey (NAFIS)-o parakani gitade, para on·gipa a·arango gama ge·aniko Meghalaya a·dok gimikni 31 percent nokdangrang ja·rikengani gimin Meghalaya a·dokan India a·song gimiko bang·batgipa ong·enga.
Gama ge·anio a·a donggipa nokdangrangko hisapskagenchimode India a·song gimiko Maharashtra a·dokan, average-o hectare 1.34 a·arang donggipa ong·e skanggipa ong·skaenga. A·a donggipa nokdangrangko hisape, Ladakh a·dokan nokdang ge·prako hectare 0.22-san ong·e komibatgipa ong·skaenga.
Una agre kraa gita average-o a·a donggipa nokdangrangara, Rajasthan a·doko hectare 1.32, Nagaland-o hectare 1.27, Andhra Pradesh aro Punjab-o hectare 0.97, Karnataka-o hectare 0.94, Odisha-o hectare 0.51 aro Uttar Pradesh-o hectare 0.37 ong·skaachim.
A·arangko parana on·gipa a·dokrango, Haryana 9.3 percent nokdangrang donge skanggipa ong·skaenga, Tamil Nadu-o 4.2 percent, Arunachal Pradesh a·doko 4 percent aro Kerala a·doko 3.9 percent nokdangrang ong·a.
