SHILLONG: National People’s Party (NPP)-o napanggipa MLA sakgittamko ‘disqualify’ ka·china ba MLA ine chananiko ra·galchina didie sedoatgipani bidingo a·dokni Congress dol, Meghalaya Legislative Assembly-ni Speaker Thomas A Sangma-na gisik ra·atpiltaianiko on·angaha.
“Puja chuttina skangan chinga Assembly-ni Speaker-na gisik ra·atpiltaianiko on·ataha aro chinga Speaker-ni disqualify ka·aniko sengkugenma ma ia sakgittam MLA-ni kosako Meghalaya High Court-na badi ka·doanggen, uani bidingo chanchirimna gita chinga bakan tom·aniko ong·atanggen,” ine Congress dolni saksa dilgipa, kobor ra·timgiparangna parakataha.
NPP-o napanggipa gitcham Congress MLA sakgittamni kosako Congress dolni saksakamkam MLA Ronnie V Lyngdoh, Meghalaya Assembly-ni Speaker-na changgni dake badi ka·doangahachim.
Skanggipao ua, Mawhati-ni MLA Charles Marngar aro Nongstoin-ni MLA Gabriel Wahlang-ko disqualify ka·china ba MLA ong·aoniko champengatchina didie re·anggipa September-ni 9 tariko Assembly Speaker-na sedoataha aro unmi ja·man Umsning-ni MLA Celestine Lyngdoh-ni kosako September-ni 16 tariko sedoatskaahachim.
Ia sakgittam MLA-rangko disqualify ka·china gita Lyngdoh, Assembly Speaker-na sal 14 somoikoba on·angahachim.
Uni badi ka·aniko chu·sokatjagenchimode, Assembly-ni Speaker-na ge·etaniko on·china gita Congress dol, Meghalaya High Court-ona re·angskagen ineba Lyngdoh parakatahachim.
