SHILLONG: MLA sakgittamni ong·kate gipin dolo napanganichi da·o Gambegre by-election-na skang Congress dolko bilgriata gita ong·aha ine Congress doloni mitam kobor on·timgiparang parakataha.
Gambegre constituency-ni gitcham MLA aro Congress dolni dilgipa Saleng A Sangma, Tura Lok Sabha constituency-ni MP-na seokako man·e MLA ong·aniko watna nangahani a·sel Gambegre by-election-ko ong·atna nangengahachim.
Congress dolni MLA sakgittam, chong·motan Umsning-ni MLA Dr Celestine Lyngdoh, Mawhati-ni MLA Charles Marngar aro Nongstoin-ni MLA Gabriel Wahlang, adita salrangna skang party-oni ong·kate NPP-o napangskaahachim aro uandaken da·o Congress dolo Ronnie V Lyngdoh saksakamkam MLA-san dongaiahachim.
Indake ong·engon, kobor on·timgiparangni u·iatani gitade, Lok Sabha election-o Congress dolni Saleng Sangma cheenba Tura-ni MP-na seokako man·ani ja·man, Meghalaya a·doko Congress dolko bilakatpiltaina miksongahachim indiba ia sakgittam MLA-rangni ong·katani ja·man Congress dol bilgribatatako man·skaaha.
Meghalaya a·doko Congress dolko dilenggiparang, maming ja·kurangko de·jaengani a·selba Congress dol bilakbapiltaina man·jaenga ineba kobor on·timgiparang a·kangataha.
“Congress dolna kam ka·enggipa manderangko rakbate kam ka·na didigipa dilgipakosa a·dokna nangenga. Uni gimin MPCC-ni president Vincent Pala an·tangan, ia daitoko jako ra·e ka·na nangenga,” ine kobor on·timgiparang parakataha.
