TURA: Manderangna koborrangko on·na kam ka·anio South Garo Hills a·jani Executive aro Administration, media-ni manderangko champengna jotton ka·aha ine Garo Hills Press & Media Association (GHPMA) matnangatani ja·man, iani bidingo South Garo Hills a·jani Deputy Commissioner Richard Yanthan talataniko on·ata
Deputy Commissioner-ni parakatani gitade, adita salrangna skang Garo Hills gimikon a·a be·ani aro chi bananirang ong·angani ja·man TatuMarak minggipa YouTuber, Chokpot C&RD Block-ni ning·o neng·nikanirangko man·enggipa manderangna dingtang dingtang bosturangko dakchake on·ani bidingo koborko on·anio, duko ga·akenggipa manderangkosan sing·sandie ra·enba sorkari official-rang ba District Administration-onikode maming talatanirangko ra·chenggija paksamsa koborkosa on·aiahachim.
“NEIG News minggipa YouTube channel-o manderangni interview-na aganchakanirangara chong·mot obosta baksade melijachim aro ian sorkari official-rangni, duko ga·akenggipa manderangna dakchake on·gipa kamrangkode jinmana mesokani dongjani giminsa iani bidingo aganchakaniko ba talataniko on·china gita South Garo Hills a·jani District Administration, TatuMarak-ko okamatahachim,” ine South Garo Hills a·jani Deputy Commissioner parakatenba, ian media-rangni kobor ra·na aro on·na jakgitelaniko champenga ong·ja indiba niamrango pangchake kakketko talatchina chol on·anisa ong·achim ine talataniko on·angaha.
Iana skang GHPMA-ni dilgiparang, South Garo Hills a·jani District Administration-ko matnangatenba, manderangna koborrangko on·na kam ka·anio media-ni manderangko champengna jotton ka·aha ine parakatahachim.
GHPMA-ni president Sanggra M Marak-ni parakatani gitade, media-ni manderang, songsalni kosako ong·gija dakanirangko, niam pe·anirangko aro dingtang dingtang kamrango chu·sokgijanirangko manderangna u·iatna gitasa kamko ka·engachim indiba iandake South Garo Hills-ni Executive aro Administration-ni champenganiara, media-ni jakgitele kam ka·na man·ani bilko ra·sekani aro pe·ani gita ong·aha.
“Democracy-ni fourth pillar ba brigipa krong ong·e Press aro Media-ra a·songko chalaianio mongsonggipa bak gita ong·achim indiba Garo Hills-o media-rangni kobor ra·ani aro kobor on·aniko champengna ka·mikkenataniko on·aniara a·songni niamo media-rangna on·gimin bil aro jakgitelaniko ra·sekani gita ong·aha,” ine GHPMA parakataha.