TURA: South Garo Hills a·jani Indo-Bangla sima jolrango, manderangko dakait daka ine kobor man·soani ja·man, ia sima jolrango songdongenggiparangna aro border rama gita re·ruraenggipa manderangna chel·chakanirangko baridapatchina South Garo Hills a·jani social activist Greneth M Sangma didiataha.
Adita salrangna skangmangmang, Netri BSF Border Outpost sambao donggipa Indo-Bangla sima jolo, bike bolgnio songreangenggipa mande sakgniko, dakait dakgipa manderang champengsoenba, uamangni bike bolsa aro ma·manti gam-jinrangko ra·seke kataha ine Budbar salosan social media-rango kobor wataniko nikna man·ahachim. Koborko on·ani gitade, dakait dakgipa manderang, atte aro churirangko ra·bite, ia mande sakgniko dakait dakaha aro uamangni Pulsar bike bolsakoba ra·e katangaha. Ua somoio ia manderang, attamni 2:00 bajimango, Baghmara-oni Tura-ona re·baengachim ineba kobor on·aha.
Ia a·selni bidingo Greneth, South Garo Hills a·jani Deputy Commissioner-na badi ka·doangjolaha.
“Ia a·sel ong·aniara a·song damgnini sima jolrango kenchakna nanganiko mesokani ong·enga, uni gimin sima jolrango songdongenggipa manderangna aro ia rama gita re·ruraenggipa manderangna naljokaniko on·na chel·chakanirangko baridapatna nangenga,” ine Greneth, Deputy Commissioner-na badi ka·e sedoatgipa chittio janapataha.
Ia sima jolrango BSF sipairangko bang·bate donchina, sima jolrango ong·gija dakanirangko champengna re·rurae nirok sandianirangko dakjringchina, jolo songdongenggipa manderangna naljoke dongani bidingo awareness program-rangko aro tom·anirangko ong·atchina aro sipai dolrang baksa jolo songdongenggipa manderangko bakrimna gita didianirangko on·chinaba Greneth mol·molataha.
Indake ong·engon, Bangladesh-o so·sojengjeng ong·engani gimin cholko ra·e mitam wholesaler-rang, Baghmara bazaar gita chinirangko badingsrukatenga ineba Greneth matnangataha aro iandake niam gri badingsrukaniko champengchina official-rangko didiataha.