TURA: Garo Hills Autonomous District Council (GHADC)-ni ning·o donggipa Non-Gazetted Employees Association (NGEA)-ni gitcham president Senora Johny Arengh-ko kamo ra·pilchina gita Meghalaya High Court, GHADC-na ge·etaniko on·angaha.
NGEA-ni gitcham president Senora Johny Arengh-ko 2021 bilsio, GHADC-ni Executive Committee aro officer-rangni kosako kragija dake matnanganirangko dakaha ine janapenba, kamoniko ra·galahachim ine nikna man·a.
Ua somoio Executive Committee-ni show cause notice-ko man·e ua EC-na aganchakani aro talatanirangko on·ahaoba uni talatanirangko jegalenba, uko kamoniko ra·galahachim.
An·tangni kamko bon·atahani gimin suk ong·jae ja·mano ua, Meghalaya High Court-o badi ka·doangaha aro uni pal ukil PT Sangma, High Court-o dakgrike, da·o una kakket bichalko man·pile on·na man·aha.
Senora Johny Arengh-na uni pilak man·gnirang baksa kamo ra·pilchina gitaba Meghalaya High Court, GHADC-ni Executive Committee-na ge·etaniko on·angaha.
GHADC-o kam ka·enggiparangna dormaharangko on·kujaengani gimin 2021 bilsio NGEA-ni gita kamrangko ka·gija jingjengaton, NGEA-ni dilgiparangna Executive Committee, show cause notice-rangko on·ahachim aro uamangni aganchakanirangara chu·ongnikani gita ong·jaha ine matnangenba, gitcham president-ni kamko chu·gimik bon·atsrangenba, NGEA-ni mitam dilgiparangkoba suspend ka·ahachim.
