SHILLONG: Meghalaya a·doko drugs jakkalani aro badingsrukaniko champengna gita uamangni on·gipa mingsni dabianirangko chu·sokatjaengani gimin re·baenggipa November jani 8 tariko, Main Secretariat-ona jinma re·jomaniko ong·atna gita Hynniewtrep Youth Council (HYC) tik ka·angaha.
Drugs jakkalani aro badingsrukaniko warachakanio bakrimaniko on·na gita ia re·jomanio bak ra·echina gitaba HYC, a·doko songdongenggipa manderangko didiataha.
HYC-ni president Roy Kupar Synrem-ni kobor ra·timgipa manderangna parakatani gitade, a·doko drugs jakkalani aro badingsrukaniko champengna gita uamang mingsni dabianirangko a·dokni Chief Minister-na on·ahachim aro ia mingsni dabianirangara, Shillong-o sorkarini treatment & rehabilitation centre-ko kulichina, pilak a·jarangon free detoxification OST aro day care centre-rangko kulichina, NDPS Act-ni pilak case-rangnan fast track court/special court-rangko kulichina, NDPS Act 1985-ni pilak case-rangkon sandiroke rai on·china, Shillong-o Narcotics Control Bureau (NCB)-ni office-ko kulichina aro gipinrang ong·achim.
Ia mingsni dabianirangko Drug Reduction and Action Mission (DREAM)-o chapatmanaha ine janapatengon, iani bidingo a·dok sorkari 2023 bilsion parakatmanaha ine Synrem aganaha.
November-ni 8 tariko Main Secretariat-ona jinma re·jomaniko ong·atna skang dingtang dingtang biaprango tom·anirangko ong·atchengna miksongenga ine janapatskaengon, October-ni 25 tariko Umsning-o, October-ni 28-o Nongstoin-o, October-ni 29-o Nongpoh-o, October-ni 30-o Iawmusiang Jowai-o, October-ni 31 tariko Mawkyrwat Market-o, November-ni 1-o Khliehriat-o, November-ni 2 tariko Mairang-o aro uandakgipa dingtang dingtang biaprangoba ong·atanggen ine HYC-ni president parakataha.
2023 bilsion a·dok sorkari, DREAM project-ko parakatahaoba da·alonan ia project-ni kamrangko nikna man·kujaenga ineba Synrem aganaha.
“Ia DREAM project-ara a·dok sorkarini jumang gitasan ong·enga dongaienga,” ine ua aganaha.
Drugs-ko warachakaniara HYC-ni dakgrikanisan ong·ja indiba ian songsalni namgnina chanchenggipa pilak manderangni dakgrikaniba ong·a aro iako sorkari ma·sina nanga ineba HYC-ni president aganaha.
“Uni gimin Meghalaya a·doko aro mongsongbate Shillong songjinmao drugs jakkalaniko gimaatna dakgrikanio HYC, a·doko songdongenggipa pilak manderangni bakrimanikon nangnikenga,” ine Synrem aganaha.
 |
ReplyForward
|
