TURA: Ia sal somoirango bi·sarangni mobile jakkalanirang batroroenganichi uamangni gisik aro be·enni gita dal·roroanio nangchakeanirangko ra·baengani gimin bi·sarangna agre mobile jakkalani namgijanirangko talate on·na gita Sonibar salo, William Initiative-ni dilanichi awareness program-ko Ballonggre-ni Petrichor Pre-School, Tura-ni Ballonggre kal·chakramo ong·atangaha.
Ia awareness program-ko ong·atanio Ballonggre jolrango donggipa dingtang dingtang biaprangoni gimik sak 150-mangni gita manderang bak ra·angtokaha aro uamangna dingtang dingtang official-rang agan-talatanirangko on·angaha.
Ia program-ko Petrichor Pre-School Managing Committee-ni membor Rev Amos Ch Sangma-ni Isolo bi·anichi a·bachengataha aro uni Isolo bi·ani ja·man, Petrichor Pre-School-ni Director Dr Gino A Sangma, jinmana rimchaksoani kattarangko aganangenba, maikai mobile phone-rangko nangana bate jakkalanichi bi·sarangni be·enni gita, gisikni gita aro songsalni gita dal·roroanio nangchakeaniko ra·bana man·a, uarangni bidingo agan-talatanirangko on·angaha.
Ia awareness program-ko ong·atanio, Tura Civil Hospital-ni Psychiatrist Dr Steve Cherak Sangma, mongsonggipa sokgipa ong·e jinmana aganprakangengon, maikai mobile phone-rangko ru·ute nianichi, bi·sarangni dakbewalko dingtangatna, poraianirango gisik nanganiko komiatna aro songsaloni chel·atna man·a, uarangni gimin agan-talatanirangko on·angaha.
Ia tom·anio Dr Sangma, dingtangmancha ma·a paarang baksaba agangrikengon, bi·sarangni mobile jakkalaniko name nirikkichina agan-ku·pattianirangko on·angaha.
Ia program-ko ong·atanio dongpae bak ra·anggipa gipin manderangara, Petrichor Pre-School-ni Headmistress Nicely Luckme M Marak, school-ni Administrator Matgrik D Shira, Wanda M Sangma aro gipinrang ong·a.
