TURA: Re·anggipa Budbar pringwalo, Tura Bazar-o wa·al kamgipa dokkanrangko Robibar salo, a·dokni Chief Minister Conrad K Sangma niangaha aro ia dokkanrangko wa·al kamanichi noksan ong·ata man·gipa manderangna man·a dipet dakchakanirangko on·na ku·rachakangaha.
Re·anggipa Budbar pringwalni 2:00 bajimango, Tura Super Market sambao donggipa dokkanrangko wa·al kamgopaha aro ia dokkanrangko wa·al kamanio lakni lak ong·gipa bosturangko kamchape bang·en noksan ong·atako man·tokaha.
Ia wa·al kamgipa dokkanrangara, Tura Super Market aro District Council Market Building sambao nangchape rikgipa dokkanrang ong·achim.
Koborko on·ani gitade, ia biapko wa·al kamanio komibeoba dam 13 dokkanrangko chu·gimik wal kamgopaha aro ia dokkanrangko wa·al kamanio komibeoba gong kror 1.2-mangni gita noksan ong·atako man·na nangaha.
Ia wa·al kamgipa dokkanrangko niangengon, a·dokni Chief Minister, wa·al kamgipa mitam dokkan nokgiparangkoba gronge agangrikjolangaha.
Wa·al kamanichi noksan ong·atako man·gipa manderangna district administration aro a·dok sorkarini gita man·a dipet dakchakanirangko on·na jotton ka·gen ine wa·al kamgipa biaprangko niangengmitingo Chief Minister ku·rachakaniko on·angaha.
“Ia dokkanrangara namen gitchambegipa dokkanrang ong·achim aro ia dokkan nokgiparang ianon pangchake janggi tangtokpaengachim indiba ia dokkanrangko wa·al kamaniara namen rasong griani ong·aha. Ia dokkanrangko kulipiltaina aro nangchakeako man·gipa manderangna chinga sorkarini gita aro district administration-ni gita dakchakanirangko on·na cholrangko sandigen,” ine Sangma aganaha.
