TURA: Meghalaya a·doko post scholarship-na dorgasto galenggipa bang·a chatro chatrirangan, income certificate-ko tarianio neng·nikanirangko chagrongna nangtokenga ine Federation of Khasi Jaintia & Garo People (FKJGP) Garo Hills Zone parakatenba, chatro chatrirangni namgnina ia neng·nikanirangko niatchina a·dokni Education Minister Rakkam A Sangma-ko didiataha.
Iani bidingo a·dokni Education Minister-na sedoatengon, Garo Hills-o scholarship-na dorgasto galenggipa bang·a chatro chatrirang neng·nikanirangko chagrongna nangtokenga maina income certificate-ko tarianio niam gita ong·jaenga ine FKJGP-GHZ parakataha.
FKJGP-ni parakatani gitade, income certificate-ko tarianio chatro chatrirangni chagrongna nangenggipa neng·nikanirangoni mingsade Garo Hills-ni dingtang dingtang biaprango income certificate-ko tarianio dingtang dingtang lekkarangko nangengani a·selan ong·enga. West Garo Hills a·jao income certificate-ko tarina gita adita lekkarangko nangengon, South West Garo Hills a·jaode income certificate-na dingtang lekkarangkosa nangskaengani a·selan chatro chatrirang neng·nikanirangko chagrongna nangtokenga ine FKJGP-GHZ parakataha.
Dingtang dingtang civil sub-division-rango income certificate-rangko on·giparang dongjani a·sel, BDO-rangni certificate-ko on·na jechakengani a·sel, online aro offline gita dorgasto galanio nangenggipa lekkarang dingtanggrikani a·sel, office-o kam ka·enggipa manderangna dakchakanirangko on·jaengani a·sel, online gita dorgasto galanio niamrang bang·ani a·sel aro uandakgipa dingtang dingtang a·selrangchi chatro chatrirang, scholarship-na dorgasto galanio neng·nikanirangko chagrongna nangtokenga ine FKJGP-GHZ parakataha.
Scholarship-ko ra·na gita income certificate-ko nangengani a·selan chatro chatrirang neng·nikanirangko chagrongna nangtokenga ine janapatskaengon, iani a·selan bang·a chatro chatrirangan, scholarship-na dorgasto galna gita nangniktokjaenga ine FKJGP parakatenba, chatro chatrirang, scholarship-na altubate dorgastoko galna man·na gita a·dokni a·ja ge·antion offline single window system-ko ra·gatskachina a·dokni Education Minister-na ku·pattianiko on·ataha.