TURA: Re·baenggipa November 13 tariko ong·atenggipa Gambegre by-election-na nomination file ka·aniko Sombar sal dipet a·bachengatahaon, ia by-election-o Independent candidate ong·e susaenggipa Sengkrabirth Ch Marak, Mongolbar salo Tura-ni DC office-ona re·bae Returning Officer-ni mikkango nomination file ka·angaha aro ia by-election-o uan nomination file ka·chenggipaba ong·aha.
Uni nomination file ka·anganio uni nokdangni manderang aro una chakpaenggipa adita sak manderangba dongpaaha.
An·tangni election-o susaani lekkarangko Returning Officer-na on·angani ja·man kobor ra·timgipa manderang baksa agangrikengon, ua an·tang chol ong·pagipa mande ong·jagenchimoba, Gambegre constituency-ni manderang uko MLA-na seokgenchimode, ua manderangni namgninan kamrangko ka·gen ine Marak aganaha.
“Anga an·tangde man·e cha·pagipa mandeba ong·jani gimin manderangna maiko dakgen ukoba agannade man·jawa indiba Gambegre constituency-ni manderang angko kranike seokgenchimode anga uamangni namgnina aro uamangni skani gitan kamrangko ka·gen,” ine ua aganaha.
Ia by-election-o Congress, NPP, BJP aro uandake dal·dalgipa party-rang baksa susaengani gimin sing·on, ia pilakan manderangni aro Isolni skaniosa ong·aigen maina Isolni skani ong·genchimode manderang, uko MLA-na seokaigen ine Independent candidate aganaha.
Ia chasongo somoirang dingtangahani gimin manderangna kamko ka·na gita chadamberangkosa nangengaha ineba Marak parakataha.
“Basakona an·ching bilgrigiparangko aro bilsi re·anggimin manderangko seokchae donggen? Bilsi re·angahaode pilakan bilgri ong·aiaha, uni gimin ia chasongode chadamberangnasa cholko on·ani ong·engaha,” ine ua aganaha.
Gambegre constituency-na mai namdapanirangko nangenga ine sing·anina aganchakaniko on·angskaengon, Gambegre-o pilakni gita namdapataniko nangkuenga indiba mongsongbate rama jal·lang, sanna banani cholrang, lekka porani kamrang, chadamberangni kamgri ong·e donganiko namatani aro uandakgipa dingtang dingtang kamrang donga ine Marak aganaha.
