TURA: West Garo Hills a·jao drugs ba pekatgipa sam jakkalaniko aro badingsrukaniko champengna police-rang rakbee kamrangko ka·engon, Sombar saloba police-rang, mande sakbriko Raksamgre samba joloniko drugs baksa rim·na man·aha.
Police-rangni u·iatani gitade, drugs badingenggipa manderangni bidingo koborko man·soani ja·man ia manderangko Sombar walni 10:00 bajimango rim·na man·aha.
Rim·ako man·gipa manderangara, Ashanur Islam (Kharbanda), Shahinur Islam (Pekamari), Khuka Miah (Doyachar) aro Sujon Mondal (Kularchar) ong·a aro uamang sakbrian Assam South Salmara a·jaoni ong·achim.
Ia manderangoniko police-rang, gram 81.22 ong·gipa heroin samrangko man·aha aro ia samrangni gamchataniara lak 7-mangna batachim.
Ia mande sakbrikon police-rang rim·e da·o ning·tubate am·sandianirangko dakengkua ine West Garo Hills a·jani SP Abraham T Sangma parakataha.
