SHILLONG: Re·baenggipa November jani 13 tariko ong·atenggipa Gambegre by-election-o susana gita BJP-ni state vice president aro Tura-ni MDC Bernard N Marak-ko Bharatiya Janata Party (BJP)-ni candidate-na seokaha.
Ganbegre by-election-na candidate-ko parakatahani gimin da·o a·dokni BJP dol, ia by-election-na kamrangko ka·na gita Budbar salo, BJP-ni national secretary, national spokesperson aro Meghalaya a·dokni in-charge AK Antony baksa tom·e chanchirimanggnok.
Iani bidingo kobor ra·timgiparangna talataniko on·angengon, BJP-ni candidate-na sakgittam manderangoniko baseenba, BJP-ni state vice president aro Tura-ni MDC Bernard N Marak-ko seokaha ine BJP-ni state spokesperson Mariahom Kharkrang parakataha.
Gambegre by-election-na da·o candidate-ko parakatahani gimin campaign ka·ani kamrangko a·bachengatgnok ineba Kharkrang aganaha.’
Kharkrang-ni aganani gitade, campaign-rangko a·bachengatna gita dingtang dingtang gadangrango BJP-ni pilak bipekrangnan u·iatmanaha.
Gambegre by-election-o Chief Minister Conrad K Sangma-ni jikgipa Mehtab Chandee A Sangma, GHADC-ni MDC Sadhiarani Sangma aro gipinrangba susaengani gimin ian namen bilakbee susagrikna sienggipa election ong·enga ine janapatengon, BJP-ni candidate Bernard Marak-ba saksa MDC ong·enggipasa ong·ani gimin aro batanggimin bilsirango BJP-ni dingtang dingtang gadangrango kam ka·e manderangni chakpaanirangko man·gipa ong·ani gimin gipinrangna bate komibata ong·jaenga ine BJP-ni state spokesperson parakataha.
Indake ong·engon, gitcham aro da·o ong·enggipa a·dok sorkarini tangka paisarangko jakkalsretahani a·sel manderangni janggi tanganio neng·nikanirangko chagrongna nangtokengani gimin namgipa sorkariko ong·atna, songo noko manderangni janggi tanganiko namdapatna aro tangka paisa jakkalsretaniko bon·atna gitasa ua Gambegre by-election-o susaenga ine BJP-ni candidate aro state vice president Bernard N Marak parakataha.
“Gambegre-ni manderang, tangka paisa jakkalsretaniko seokgenma ma namgipa sorkariko ong·atna seokgen, uade manderangni jakosajok. Tangka paisa cha·rakgipa sorkarini a·selan Gambegre constituency-ni kangal cholgri aro kakket ong·gipa manderang neng·nikanirangko chagrongna nangtokenga. Ia by-election namen dingtangmanchagipa election ong·na sienga maina ia by-election-o sorkarini dakchakanirangko man·jaenggipa manderang BJP-nan pu·ontelgen,” ine Marak parakataha.
Tura Parliamentary constituency-oni seokako man·e Gambegre constituency-ni MLA Saleng A Sangma, kamtangko watangna nangani ja·man Gambegre constituency-ni seat bangbang ong·na nangahachim aro iani a·selan da·o by-election-ko ong·attaina nangengachim.
Ia by-election-na Trinamool Congress (TMC)-ni candidate aro GHADC-ni MDC Sadhiarani M Sangma, October-ni 23 tariko, Chief Minister Conrad K Sangma-ni jikgipa aro National People’s Party (NPP)-ni candidate Mehtab Chandee A Sangma, October-ni 24 tariko aro Congress dolni candidate Jingjang M Marak-ba October-ni 24 tariko nomination file ka·angnaba gnang ine ka·dongsona man·enga.
Gambegre by-election-na nomination file ka·ani bon·kamgipa salara October 25 tarik ong·enga.
