TURA: Scholarship-na dorgasto galanio chatro chatrirang bang·batan neng·nikanirangko chagrongna nangtokengani gimin chatro chatrirangna chu·onga gita somoiko on·na man·na gita dorgasto galani bon·kamgipa tarikko ra·dodapatchina A·chik Conscious Holistically Integrated Krima (ACHIK), a·dokni Education Minister Rakkam A Sangma-ko didiataha.
Education Minister-na sedoatgipa chittio ACHIK dolni parakatani gitade, scholarship-na dorgasto galanio dingtang dingtang nangchongmotgipa lekkarangko tarianio, badiaba badiaba biaprango internet-ko name man·jani a·selo aro scholarship-na dorgasto galani bidingo name talate on·anirang dongkujani a·sel chatro chatrirang neng·nikanirangko chagrongna nangtokenga aro scholarship-na dorgasto galanio somoirangko on·dapna nangkuengachim.
Online gita scholarship-na dorgasto galanio dingtang dingtang neng·nikanirangko chagrongna nangtokengani a·selba chatro chatrirang somoi gita dorgastorangko galna man·tokjaenga ineba ACHIK parakataha.
Somoiko on·dapjagenchimode bang·a chatro chatrirangan an·tangtangni man·na nangenggipa scholarship-rangko man·riktokjawaha ine janapatengon, chatro chatrirang scholarship-ko ra·na gita nangchongmotgipa lekkarangko tarina aro dorgastorangko galpana man·na gita dorgasto galani somoiko komibeoba sal 20 ba una bateba ra·dodapatchina ACHIK dol, a·dokni Education Minister Rakkam A Sangma-ko mol·molataha.
