SHILLONG: Gambegre Assembly constituency-ni by-election-ko re·baenggipa November 13 tariko ong·atengani gimin BJP-ni candidate Bernard N Marak-na campaign ka·na gita BJP-ni dingtang dingtang dilgiparangko biming mingsomanaha.
Koborko on·ani gitade, Gambegre by-election-na BJP-ni national secretary Anil Antony-ba Garo Hills-ona re·bae campaign ka·anggen aro unbaksana a·dokni dingtang dingtang dilgiparangba campaign ka·anggen.
Gambegre by-election-na campaign ka·na gita donsogimin BJP-ni dilgiparangara, a·dokni Cabinet Minister AL Hek, BJP MLA Sanbor Shullai, BJP-ni state president Rikman Momin, gipin dilgiparang, jekai David Kharsati, Sukhi Pariat, Anzie Sangma, Sewina Marak aro uandakgipa dilgiparang ong·enga.
Gambegre by-election-o susana gita Bristibar salosan, BJP-ni candidate aro BJP-ni state vice president Bernard N Marak, nomination file ka·angaha aro ia by-election-o ua chegipa ong·na ka·dongenganikoba parakatahachim.
Songadam nokadamrango donggipa bang·a manderangan ma·mong sorkarini on·enggipa dingtang dingtang scheme-ni namgnirangko man·tokjaengani gimin ia scheme-rangko manderangona sokatanian BJP aro uni mongsonggipa daito ong·enga ine ua aganaha.
NPP-chi dilenggipa MDA sorkario BJP bak ong·paengoba Garo Hills-o BJP-ni MLA saksaba dongjani a·selsa ma·mong sorkarini scheme-rangko a·dok sorkari ra·sekna jotton ka·enga aro iani giminsa ua ma·mong sorkarini ra·gatgipa pilak scheme-rangkon kangal cholgrirangna sokatna gita Gambegre by-election-o susaenga ineba Marak aganaha.
Apsan salon, NPP-ni candidate Mehtab Chandee A Sangma aro Congress dolni candidate Jingjang M Marak-ba nomination-rangko file ka·angaha.
Gambegre by-election-o susana gita TMC-ni candidate Sadhiarani M Sangma aro Independent candidate sakgni, chong·motan Sengkrabirth Ch Marak aro Jerry A Sangma-ba nomination file ka·angaha.
Nomination-ni lekkarangko October 28 tariko nipilanggen aro nomination-rangko ra·pilani bon·kamgipa tarikara October 30 tarik ong·skaenga.