New Delhi: Gambegre Assembly by-poll-rang ong·na anti gittamsan dongaiahanichi election-o party-ni susaani gimin J P Nadda, a·dokni minister A L Hek baksa che·em che·em chanchigrikaha aro Meghalaya-o pilak bil amako dakchakna uko ka·dongataha.
Assembly ba parliament ong·chong a·songo a·-songni party seat ge·sa-kode cheaiaonin Nadda, a·dokni BJP dilgipa baksa ru·ute agangrikaha. Re·ba-enggipa jao Maharashtra aro Jharkhand-o Assembly by-poll-rang ong·nasienga baksana dingtang dingtang a·dokrango ge 48 assembly constituency-rango aro ge·gni parlia-mentary constituency-rango bye election-rang donga.
Ong·nasienggipa bye election-rangna mong-songgipa campaign ka·-giparangni bimingrangko Nadda, party parakat-manaha ine Hek u·iataha. A·brini jat bang·gipa constituency-o party uamangni jotton ka·aniko bilakbatatani gimin nisan donenga, ua aganaha.
A·bachenga gadango manderang baksa agan-grike joltangni neng·nikani-rangko namate on·a aro puongiparangko nirokani gimin BJP nisan ka·enga, Hek, party-ni President-na aganaha. Ru·utgija salo Haryana Assembly poll-rango party-ni chu·sok-gipa ong·ani giminba ua una nama skaniko on·aha.
Gambegre consti-tuency-na BJP-ni can-didate, Bernard Marak, sason ka·enggipa National People’s Party-ni Dr Mehtab Chandee A Sangma, Opposition TMC-ni Sadhiarani Sangma aro Jingjang M Marak, Congress-ni unagreba independent-rang mong-songgipa sak bri baksa bilting-biltang susaani ong·enga. Mehtab, Chief Minister, Conrad K Sangma-ni jikgipa aro Sadhiaraini, cabinet minister gitcham Zenith Sangma-ni jikgipa aro opposition leader Dr Mukul Sangma-ni namchiktang ong·a.
A·dokni a·bri jatni a·jolrango uamangni susaanio chena pilak party-rangan krengna Bye-election bilsugipa susaani ong·enga. NPP aro TMC Garo Hills-o dokkol ka·na jotton ka·kuenga.
NPP a·doko sason ka·genchimoba Tura Lok Sabha seat-o Congress-ni jako ama cha·aha, TMC, Congress aro BJP batang-gimin bilsio assembly election-rango name chu·sokgijaniko nikaha. Bye election-rangko da·o Congress MLA ong·-enggipa Salenga Sangma-ni Tura Lok Sabha poll-rango cheanichi uni kam watanichi ong·atna nang-chongmotgipa ong·aha.
BJP Garo Hills-o bang·en noksan ong·ako kolgapatna jotton ka·enga maina party vote man·a per cent namen komigipa ong·an baksana seat ge·saba man·jaha. Congress Tura-o batanggimin Lok Sabha poll-rango namen chu·sokgopa ong·anichi chena ka·dongenga.
By poll-rangko November 13-o ong·atna sal manchimanaha aro vote-rangko November 23-o changen. BJP national President, ia dal·begipa by-poll-o chena a·dokni unit-na party-oni pilakkon dakchakna ka·dongataha, Hek aganaha.
