SHILLONG: Gambegre Bye election-na BJP candidate, Bernard Marak-ni kosako gatgipa donchipenggipa ming bonga mamlarang donga.
Uni segatgipa affidavit-o janapani gita uni kosako segatgipa donchipenggipa ming bonga mamlarang gimikan Tura PS aro Tura Women PS-o ong·a.
Minggni mamlarang uni kosako POCSO-ni ning·o segataha unbaksana Meghalaya Maintance Public Order (MMPO)-ni ning·o uni kosako mamla segatgipaba donga.
FIR ka·giparangoni mingsa saksa bilsi 13 ong·gipa nokoni gimenga aro ja·mano badi ka·ao ma·sina man·ani gita Matchakolgre-ni Happi minggipa mande saksa Sella Wari-jolo uni demechik rim·gittange til·ekaha.
Sakgipin FIR ka·ao janapani gita Bernard Marak niam gri an·tangko Tura jilani Nokma ine a·kangaha, sakgipin FIR ka·ao janapani gita MDC-ko ka·mikkenataha aro Superintending Engineer, Civil Works, GHADC-o golmal ka·aha. Marak uko mikkango su·aha ine badi ka·gipa matnangaha.
Ge·gipin FIR ka·gipao Rimpu Marak aro adita sak manderang me·chik saksani nokona re·angaha aro uko slai jottike uko jitpakaha aro uni ka·bakko dangtapaha ine FIR ka·gipao matnangaha.
Ge·gipin FIR ka·ao Tura jilani gisepo bang·a biaprango aroba Rimpu Bagan-o Bolero gari bolsao Facebookni ripeng saksa me·chik saksako til·ek-an·chana doke-sataha ine janapaha.
Mingbonga mamla-rangoni minggni mamla-rango matnanganirang gachataha aro uni kosako mamlarangoni mingsaosan mol·molani dorkastoko on·aha.
