SHILLONG: Mawsynram C&RD Block-ko Civil Sub-Division songchina dabie, Khasi Students Union (KSU) South West Khasi Hills District baksa KSU Balat Border area circle, KSU Lawbah Border area circle aro KSU Sawsymper circle, dingtang dingtang program-rangko ong·atna manchiangaha.
“Batanggimin somoirangoba chinga Mawsynram Block-ko Civil Sub-Division songchina dabie, jingjengatanirangko dakangaha indiba sorkari chingni dabianirangko knachakkujaengani gimin chinga da·oba changsataie jingjengatanirangko a·bachengattaina tik ka·aha. Mawsynram C&RD Block-ko Civil Sub-Division songchina dabie chinga ia pilak jolrangon signature campaign-ko ong·atangchenggen,” ine KSU Balat Border area circle-ni president Bonsen Snaitang parakataha.
Ia signature campaign ba soi ka·grime jingjengataniko November 1 tarik attam 4:00 bajioni Lawbah-o a·bachengatgen, uni ja·man November-ni 6 tariko Jyllep-o, November-ni 11 tariko Dangar-o aro November-ni 23 tariko Sawsymper-o ong·atanggen ineba Snaitang parakataha.
Ia apsan program-kon Mawsynram-oba ong·atanggen aro iana tarikko ja·mano u·iatgen ine KSU-ni dilgipa aganaha.
KSU-ni parakatani gitade, Mawsynram C&RD Block-ara bilsi 62 batpilengahani gimin a·doko gitchambatsranggipa C&RD Block-rangoni damsa ong·e, Civil Sub-Division songako man·na nangengahachim.
Mawsynram-ko Civil Sub-Division songchina ru·utbea bilsirangonin jolo songdongenggipa manderang dabitokengachim ine janapatengon, iako politician-rang aro political dolrang, election-rango an·tangtangna political agenda dakesa ra·skana jotton ka·enga ine KSU suk ong·gijaniko parakataha.
Signature campaign-ko ong·atanio Mawsynram block-ni ning·o donggipa pilak manderangkon bakrimchina gitaba KSU mol·molataha.