SHILLONG: Meghalaya a·doko, mongsongbate Khasi-Jaintia Hills a·jarango rel gari ra·baaniko dingtang dingtang dolrang jegalsotokengoba, a·dokna chamgimin railway project-rangko sorkari galchipkujaenga ine a·dokni Deputy Chief Minister Sniawbhalang Dhar parakataha.
“An·ching iani bidingo name chanchienba tik ka·na nangenga maina skanggipao chinga pilak dolrangkon ia kamo bak ong·atna nangnikenga. Pilakan bakrimgenchimosa sorkari, name ja·kurangko de·na man·gen,” ine Dhar aganaha.
Guwahati-oni Shillong-ona high-speed luxury rail network-ko Meghalaya Tourism Development Forum (MTDF)-ni ra·bana miksongenggipani bidingo sing·on, ian nambegipa chanchiani ong·a ine Dhar aganaha.
Indake ong·genchimoba, iade uni department-ni ning·o ong·jani gimin ua an·tangde iani gimin bang·e ma·sipaja ine ua aganaha.
Meghalaya a·dokona rel garirangko ra·bagenchimode, niam gri napsrukanirang bilongbatgnok ine Khasi-Jaintia Hills a·jarango rel gari ra·napbaaniko dingtang dingtang dolrang raken jegaltokengachim.
Bostu salgipa rel garirangko ra·napbagenchimode bostu salgipa truck garirangni bading chiwale cha·ani cholrangba gimagnok ine truck dolrangba rel gari ra·baaniko jegaltokengachim.
Da·o dipet Meghalaya a·dok gimiko Mendipathar-onasan rel rama dongkuenga ine nikna man·a.
