Tura: Bangladesh-ni manderangni ma·chake dongengani koborrangko man·soani ja·mano West Garo Hills (WGH) police, sakgittam bi·sarangko man·chape komibeoba Bangladesh-ni sakchet manderangko, Bangladesh sima ariogipa Dalugaon joloniko rim·eaha.
West Bengal-ni Murshidabad district gita Indiaona niamgri napbaani ja·mano meja October 28 tariko Bangladesh-ona re·pilangmitingo ia sakchet Bangladeshi-rangko police rim·aha.
Koborogita, chanchichipgipa Bangladesh-ni manderangko Dalugaon PWD ramao nikenga ine walni 9:30 bajimango Dalu PS-na kobor on·ataha, uni ja·mano dolsa police uamangko rikangengba Police Station-ona rim·bapilaha.
Uamangko Foreigners Act, 2005-o pangchake rim·aha.
Rim·a man·gipa Bangladesh-ni manderangara Bilal Hussain (31), Md Alongir Hussain (51), Md Sahin Hussain (19), Md Rimon (19), Belli Bibi (30) aro chadambe sakgittam jemangan bilsi 17, 14 aro 8 bilsirangni ong·achim.
Uamango sing·sandianiko dakani ja·mano indake u·ina man·aha je, Bangladesh-ni manderang batanggimin 2020-ni June/July jani gisepo niamgri West Bengal-ni Lalgola Murshidabad (WB) gita Indiaona napbaaha aro Bangladesh-ona re·pilangna miksongenba Dalugaon songona re·angengachim, jemangon songre-songbatani choligipa lekkarang dongjachim.
Uamang gimikan Bangladesh, Rajshahi district-ni Godavari PS-ni ni ning·gipa Chor Asaria-o songdonggiparang ong·achim.
