An·tangni kosako inquiry dakako mikkangpana man·aigen ine NEHU VC agana

SHILLONG: North Eastern Hill University (NEHU)-ni Registrar (Retd) Colonel Omkar Singh-ko ra·galchina aro university-o niam gri rakkigipa kamrangko ra·galchina dingtang dingtang dolrang dabitokengon, ia dolrangni matnanganirangna uni kosako inquiry-ko dakna nanggenchimode ua mikkangpana man·aigen ine NEHU-ni Vice Chancellor Prof Prabha Shankar Shukla parakatskaaha.
“Ia matnanganirangko inquiry dakchina anga ge·etna man·aigen ba sorkariba inquiry committee-ko songna man·aia. Anga je dakgipa inquiry-koba mikkangpana man·aigen,” ine Prof Shukla, an·tangni office a·palo, jingjengatenggipa chatro chatrirangna aganaha.
NEHU-ni Registrar aro gipin official-rangko ra·galchina dabienggipani bidingo janapatengon, kam ka·sogimin mandeko ra·galanide altua kam ong·ja maina iano dingtang dingtang niamrangko ja·rikna nanga ine Prof Shukla aganaha.
NEHU-ni Registrar ba Deputy Registrar maikoba ong·gija dakgenchimode, uni sakkiko chatro chatrirang mesokna nangachim indiba da·alona kingkingan ia dolrang maming sakkirangko mesoka dongkuja ineba Prof Shukla aganaha.
“Uamangni kosako na·simango maiba lekkarang donggenchimode ka·sapae uarangko angna on·ebo,” ine Prof Shukla, chatro chatrirangko aganaha.
Indake ong·engon, NEHU-ni Registrar aro gipinrangko kamo rakkiani pilak nangchongmotgipa lekkarangko a·songni President, Prime Minister aro National Commission for Scheduled Tribes (NCST)-na watatmanaha ineba NEHU-ni VC parakataha.
“Niamo pangchake sorkarini ge·etanirangko anga maniaigen aro iani bidingo anga sorkarini aganchakanina sengkuenga,” ine ua aganaha.
Chatro chatrirangni jingjengatenganichi university-ni kamrangko champenga gita ong·engani gimin Registrar aro Deputy Registrar-ni office-rangko oe on·pilchina gitaba Prof Shukla, jingjengatenggipa chatro chatrirangko didiangaha.
Registrar aro Deputy Registrar-ni kuturio donggipa file-rangko ra·na man·jaengani a·sel casual employee-rangna dormaharangko on·na man·kujaenga ineba NEHU-ni VC parakataha.
Registrar aro niam gri kamo rakkigipa pilak officer-rangkon ra·galchina gita NEHU Students Union (NEHUSU) aro KSU NEHU Unit, November 4 tarikni waljatchiona VC-na somoiko on·angahachim. NEHU Shillong aro Tura campus-na Pro-Vice Chancellor-ko songe on·china gitaba ia dolrang, Vice Chancellor-o dabitokengachim.