SHILLONG: Meghalaya Legislative Assembly-ni gital building-ko rikanio somoirangko ra·dodaptaiani dongjawaha aro donsogimin somoi gitan matchotgnok ine Bristibar salo, Shillong songjinmani Mawdiangdiang-o rikenggipa gital Assembly nokko nieani ja·man Assembly-ni Speaker Thomas A Sangma parakataha.
Mawdiangdiang-o rikenggipa gital Assembly nokko nieani somoio Assembly Speaker baksana Assembly-ni Commissioner & Secretary Dr Andrew Simons, Secretary Malthus Sangma aro Assembly Secretariat-ni officer-rangba dongpaahachim.
Gital Assembly building-ko niangani ja·man kobor ra·timgipa manderang baksa agangrikengon, Assembly nokko rikanirang da·o namen matchotangenga aro ia Assembly building-ko donsogimin somoi gitan matchotna ka·dongenga ine Assembly Speaker Thomas Sangma parakataha.
“Da·al salni bako anga silni bimangko tarienggipa bakko nieaha. Mijamangmangsan contractor, designer aro PWD-ni gisepo ma·sisretgrikanirang dongachim indiba ia pilak ma·sisretgrikaniko da·o namatna man·aha. Kam ka·giparangna aro ia building-na naljokaniko on·anian chingni mongsonggipa nangnikani ong·enga aro iani bidingo chinga Standard Operating Procedure (SOP)-ko ra·gataha,” ine Sangma aganaha.
Ia Assembly building-ko rikani kamrang matchotna siengahaon, Speaker-ni office, Chief Minister-ni chamber, Secretariat office-rang aro library-ko man·chape jakra aro jakasini wing-rangko 90 percent-de matchotaha aro da·o central wing-san bangki dongaiaha ineba Sangma parakataha.
Donsogimin somoina jasamangni gita ja·manchakaha ine ku·chakangengon, ia gital Assembly nokko matchotna gita somoiko ra·dodaptaijawaha ine Assembly Speaker parakataha.
“Chinga somoi gitan ia nokko matchotatna jotton ka·enga aro protchongni bakrangkoba da·o sal 45-ni gisepon matchotatgnok ine contractor aro Project Management Consultant, chingna ku·rachakaniko on·aha,” ine Speaker aganaha.
M’laya Assembly-ni gital building-ko somoi gitan matchotgen: Speaker
Date:
Share post:
