TURA: South Garo Hills a·jani Deputy Commissioner (DC) office ning·ao ma·manti bosturangko palenggipa manderang nape bosturangko palengani a·sel kam ka·giparang kamtangtangko name aro gisik nange ka·na man·tokjaenga ine South Garo Hills a·jani A·chik Conscious Holistically Integrated Krima (ACHIK) dol parakatenba, DC office ning·o iandake bostu palbadinggiparangko napna on·jachina South Garo Hills a·jani Deputy Commissioner-ko didiataha.
“Angni DC office-ona re·angmiting somoio ba·ra palgipa mandeni office-o nape kam ka·giparangna ba·ra palako anga nikaha. Kamni somoio ia ba·ra palgipa office-ona re·angani a·sel kam ka·giparang kamtangtangko ka·gija ia badinggipa mandeni ba·rarangkosa nie dongskaaha,” ine ACHIK Southern Zone-ni general secretary Wilban N Sangma parakatenba, iandake office-ni somoio bostu palbadinggipa manderangko office ning·o napna on·jachina South Garo Hills a·jani Deputy Commissioner-ko didiataha.
South Garo Hills a·jani DC office-o, mongsongbate general branch-o iandake bosto palbadinggipa manderangko napna on·jachina aro pilak branch-rangkon office-ni somoio bostu palbadinggipa manderangko napna on·jana gita ge·etaniko on·chinaba ua didiataha.
“Uni gimin bostu palbadinggipa manderangni office-o napaniko champengna gita Section 163 BNSS-ko ra·gatchina, pilak branch-rangon ba·ra ba dingtang dingtang bostu palgiparangko napna on·jana gita ge·etaniko on·china aro office-ni somoiara koros ka·ani ong·ja indiba kam ka·ani somoisa ine kam ka·giparangna gisik ra·ataniko on·china anga didienga,” ine ACHIK-SZ-ni general secretary, SGH-ni Deputy Commissioner-na sedoatgipa chittio janapataha.