A·doko sak 18,000 train ka·kugijagipa skigiparang dongkuenga: Edu Min

SHILLONG: A·doko sak 18,000 train ka·kugijagipa skigiparang dongkuengon, Diploma of Elementary Education (D.EL.ED) gita dakgipa apsangipa online programme-rangko a·bachengatchina A·dok sorkari, ma·mongko mol·molaha.
“A·doko da·oba sak 18000 batpilen train ka·kugijagipa teacher-rang dongkuenga. Indake re·anggipa somoio Skills Development-ni Minister of State-ni a·dokona wenbaani somoio, iani bidingoba chanchianiko nakataha. Uamangna changsano training-ko on·nade man·jawa” ine Education Minister, Rakkam A Sangma aganaha.
Train ka·kugijagipa sak 18,000 skigiparangni gisepo sorkarini, SSA, adhoc aro private teacher-rang gimikan man·gopa.
Unaskangde a·dok, National Institute of Open Schooling (NIOS)-ni  teachers education-ni course-rangko ra·achim, indiba uko 2017-onin dontongaha jeon, Uttrakhand-ni mamlao, online gita D.EL.ED course-ko dakgiparangkode sorkarini gita kamna rakkina cholijawa ine changen inenba Suprem Court rai on·ahachim.
Indake ong·engon Education Minister indake aganaha je, “Meghalaya-o pilak NIOS-o D.EL.ED diploma-ko dakgiparang gimikan kamrangko ka·enga unigisepon cholia choligijako sing·anide maming kattaan nabaha”.
‘‘Skango D.EL.ED course-ko ra·a gita dake apsangipa programrangko online gita a·bachengatna man·genma man·jawama uarangni bidingo chinga  IGNOU, NIOS GOI-na seataha’’ ineba Education Minister aganaha.
Train ka·kugijagipa teacher-rangni a·sel chatro-chatrirangna skie on·anio maiba nangchakeani ong·genma ine sing·engon, “Oe ian skie tariani kam ong·a, indiba anga saksa ramramgipa mande ong·enba iako agangen, diploma aro certificate-de jeba ong·china indiba nang·ni on·kanganisa mongsonggipa ong·a,” Sangma aganaha.
“Oe beben Sorkarini daksogiminrang apsanan nanggipa ong·a aro uandake training-ba, aro train ka·kugijagipa teacher ong·genchimoba na·ba darangnaba ja·manchakja, nang·ni on·kanganiosa pangchaka,” ua agandapaha.
Ua indakeba parakaha je, A·dok sorkari District Institute of Education & Training (DIET)-ko Williamnagar aro Tura-o kulidapnasienga aro Martin Luther University dakgipa gipin university-rangoba kulidapna nienga aro B.Ed course-rangko a·bachengatchina permission ba bilko bi·enga.