SHILLONG: North Eastern Hill University (NEHU)-o ong·gija dakgipa kamrangko sandirokna songa man·gipa inquiry committee-ko NEHU-ni Vice Chancellor Prof Prabha Shankar Shukla seokna man·jawa aro ian inquiry jakgitelgipa ong·na nanga ine Robibar salo NEHU Teachers Association (NEHUTA) dabiangaha.
Iani bidingo kobor ra·timgipa manderang baksa agangrikengon, inquiry committee-ko NEHU-ni VC an·tangni namnikani gita seokna man·jawa ine NEHUTA-ni president Prof Lakhon Kma parakataha.
Inquiry committee-ni membor-rangko NEHUTA, NEHUSU, NEHUNSA, Meghalaya Tribal Teachers Association (MeTTA-NEHU) aro university-ni gipin dolrangsa recommend ka·na nanggen ineba ua aganaha.
“Inquiry committee-ni membor-rangko NEHU-ni VC-na seokgenchimode uan mikkang nitee seokanisa ong·aigen,” ine Prof Kma aganaha.
NEHU-ni Registrar (Retd) Colonel Omkar Singh baksana kamo niam gri rakkia man·gipa official-rangko ra·galchina ia dolrang dabitokengon, uni kosako inquiry dakaniko ua mikkangpana man·aigen ine NEHU-ni VC Prof Shukla aganskaahachim.
“Ia matnanganirangko inquiry dakchina anga ge·etna man·aigen ba sorkariba inquiry committee-ko songna man·aia. Anga je dakgipa inquiry-koba mikkangpana man·aigen,” ine Prof Shukla aganahachim.
Indake ong·engon, NEHUTA-ni general body meeting-ko ong·atanio pilakan, NEHU-ni Registrar, Deputy Registrar aro niam gri kamo rakkia man·gipa official-rangko ra·galchina dabianio chu·gimik bakrimaniko on·aha ine NEHUTA-ni president parakataha.
NEHU-ni Registrar aro gipin official-rangko ra·galna gita NEHUSU aro KSU NEHU unit-ba NEHU-ni VC-na November 4 tarikona somoiko on·angahachim. Shillong aro Tura campus-na Pro Vice Chancellor-rangko songchina gitaba ia dolrang dabiangtokaha.
