SHILLONG: Official-rangko seokanio North Eastern Hill University (NEHU)-ni Vice Chancellor Prof Prabha Shankar Shukla-ni dakgipa kamrangara, NEHU Act, Ordinance & Regulations-ko pe·ani gita ong·a ine matnangatenba, uni kam ka·ani bewalrangko namdapatna gita ua mai ja·kurangko de·aha, uani bidingo talataniko on·china gita Mongolbar salo Voice of the People’s Party (VPP), North Eastern Hill University (NEHU)-ni Vice Chancellor-o dabiangaha.
Re·anggipa October jani 3 tariko, VPP-ni president Ardent Miller Basaiawmoit aro Shillong-ni MP Ricky AJ Syngkon, NEHU-ni Vice Chancellor-ko gronge chanchirimani ja·man, uni kamrangko namdapatna gita ua mai ja·kurangko de·aha, uani bidingo talataniko on·china dabie Mongolbar salo, VPP-ni finance secretary Danny Langstieh, NEHU-ni VC-na chittiko sedoataha.
Iani bidingo kobor ra·timgipa manderang baksa agangrikengon, jasa skang party-ni dilgiparang NEHU-ni VC-ko gronge agangrikani ja·man, uni kamrangko namdapatani bidingo talataniko on·china dabie uamang VC-na chitti sedoataha ine VPP-ni finance secretary parakataha.
Langstieh-ni parakatani gitade, NEHU-ni VC dingtang dingtang kamrango jakchakgija ong·engani gimin Mongolbar salo uamang chittiko on·na gita NEHU-ni VC-ko grongbana man·jaha aro uamang VC-ni personal assistant (PA)-osa chittiko on·baaha.
NEHU-o niam gri rakkigipa pilak official-rangkon ra·gale, an·tangni kamko namdapatchina gita uamang VC-ko didiataha ineba ua aganaha.
Shillong aro Tura campus-rango Pro Vice Chancellor-ko songchina dabiangaha ine janapatengon, Tura campus-ni campus director-ko ra·galchina gitaba uamang, NEHU-ni VC-o dabiangaha ine VPP-ni dilgipa parakataha.
