TURA: Bristibar salo, West Garo Hills a·jani Rajabala Bazar-o donggipa nok te·sa aro nok baksa nangchapgipa dokkanrangkoba wa·al kamaha aro ia nokrangko wa·al kamanio, mande sakgni sina nangaha aro gipin sakgni manderang saknaaniko man·aha.
Koborko on·ani gitade, ia a·sel ong·ani Bristibar pring 10:30 bajimango ong·aha aro bakan iani bidingo Rajabala police station-na kobor on·ataha.
Ia nokko wa·al kamanio nokni nokgipa Rajnikant Bhowmik aro uni jikgipa Kamala Kanta Bhowmik sina nangaha aro uamangni demechik baksana su·gipaba bilongbee saknaanirangko man·aha. Saknaa man·gipa manderangko ta·raken sanna gita Haatsingimari Civil Hospital-ona ra·angchengaha aro ja·mano uamangko nambate sanna, Tura Civil Hospital-ona watatskaaha.
Ia nokko wa·al kamanichi, sambao donggipa dokkan damgnikoba wa·al kamchapahani a·sel dokkan nokgiparang, bang·en noksan ong·na nangaha ine u·iataha.
Kobor on·timgiparangni u·iatani gitade, ia noko bijoli kamsotani a·selsa wa·al kamchakataha indiba nokko ta·raken wa·al kamgopahani gimin nok nokgipa aro uni jikgipade, ua biaponi katsrapjae, janggiko gimaatna nangaha.
Wa·al kamanichi baditana kingking noksan ong·atako man·aha, iani gimin official-rang hisapna gita a·bachengaha ineba kobor on·aha.
Ia koborko seatengmiting somoiona kingkingan saknaa man·gipa me·chik aro uni depante, namjabegipa obostao ong·kuenga ine kobor man·aha.
